Ullern kyrkje i Oslo
Ullern kyrkje er ei i romansk korskyrkje i stein frå 1903 på eigedomen Holgerslyst på Ullern i Oslo. Eigedomen vart gitt som gåve til kommunen av hoffsjef Herman Severin Løvenskiold. Kyrkja er teikna av Harald Bødtker og vart innvigd 3. juni 1903 av biskop Anton Christian Bang.[3]
| Ullern kyrkje i Oslo | |||
| kyrkje | |||
 Foto: Erlend Bjørtvedt | |||
| Kyrkjesamfunn | Den norske kyrkja | ||
|---|---|---|---|
| Bispedøme | Oslo | ||
| Prosti | Vestre Aker | ||
| Sokn | Ullern menighet | ||
| Stad | Ullern kyrkje | ||
| Type | Korskyrkje | ||
| Periode | Romansk | ||
| Arkitekt | Harald Bødtker | ||
| Teknikk | Mur med pussa kvitkalka flater | ||
| Material | Stein | ||
| Innvigd | 3. juni 1903 | ||
| • Endringar | 1939-1941 ved Domenico Erdmann | ||
| Tårn | Firkanta tårn med tre vindauge på kvar side | ||
| Klokker | Tre klokker frå Olsen Nauen Klokkestøperi | ||
| Kyrkjegard | Ullern kyrkjegard | ||
| Preikestol | I tre frå 1903 | ||
| Døypefont | Font av kleberstein frå 1903 | ||
| Altartavle | Kormåleri av Eilif Peterssen; Kristi himmelfart | ||
| Orgel | Frå Åkerman & Lund orgelbyggeri | ||
| Sitjeplassar | 800 evt. 900[1][2] | ||
| Diverse | Glasmåleri av Gabriel Kielland frå 1903 | ||
 Ullern kyrkje 59°55′32″N 10°39′17″E / 59.92555556°N 10.65472222°E | |||
| Wikimedia Commons: Ullern kirke, Oslo | |||
Dei opphavlege teikningane til kyrkja var ved Georg Andreas Bull, stadskonduktøren i Oslo. Desse vart omarbeidd ved arkitekt Johan Storm Munch i 1899 og godkjend av kommunen. Teikningane gjekk tapt same år da garden Munch hadde kontor i brann ned. Oppdraget gjekk difor til Harald Bødtker som nett var tilsett som kommunearkitekt i Aker.[4]
Den korsforma bygningen er dominert av eit kraftig midttårn. Tårnet er firkanta og har tre vindauge på kvar side. Det vert avslutta av eit pyramideforma spir dekt av kopar.
I åra 1939-1941 vart kyrkja restaurert av Domenico Erdmann.[4]
Ullern kyrkje er rikt smykka ut og har tre galleri. Apsisen i koret er dominert av måleriet Kristi himmelfart som vart utført av Eilif Peterssen i 1908-1909. Det er måla al secco - på tørr murvegg. Måleriet var ei gåve frå statsminister Carl Otto Løvenskiold[3]Under måleriet er friser laga av Domenico Erdmann. I koret er òg ein bysantinsk baldakin boren av fire søyler i italiensk marmor.
I tverrskipa er Gabriel Kielland kunstnaren bak dei store glasmåleria som førestiller Kristus og evangelistane. Ved hovudinngangen er plassert eit bronserelieff av Wilhelm Rasmussen og i koret eit relieff av Anders Svor.
Preikestolen og døypefonten er begge frå 1903. Døypefonten er i kleberstein og laga av Joh. Grønseth & Co. Sølvfatet og vassmugga som høyrer til er frå gullsmedfirma David Andersen. Da kyrkja vart innvigd i 1903 hadde det eit orgel frå J.H. Jørgensens orgelfabrikk. Dette vart skifta ut med eit orgel frå Åkerman & Lund orgelbyggeri i 1987.[3]
Referansar
endre- ↑ Kjeldene gjev opp ulikt tal på sitjeplassar, Oslo byleksikon skriv 900, Norsk kirkeleksikon 800. Kirkebyggdatabasen skriv 800.
- ↑ Ullern kirke / Kirkesøk
- ↑ 3,0 3,1 3,2 Oslo byleksikon side 592
- ↑ 4,0 4,1 Ullern kirke av Geir Tandberg Steigan frå Arc!
Litteratur
endre- Alf Henry Rasmussen (red.): Våre kirker - Norsk kirkeleksikon, side 700, Vanebo forlag 1993, ISBN 82-75-27022-7
- Knut Are Tvedt (red): Oslo byleksikon, Kunnskapsforlaget 2010, side 592-593, ISBN 978-82-573-1760-7
Bakgrunnsstoff
endre- Ullern kyrkje i Oslo i kulturminnesok.no, nettstaden til Riksantikvaren