Vasilij Kudinov

Vasilij Kudinov (17. februar 1969–11. februar 2017) var ein russisk handballspelar. Han vann to gull- og ein bronsemedalje i olympiske leikar i tida 1992–2004, to VM-gull og eitt VM-sølv i tida 1993–1999, og dessutan gull- og sølvmedalje i europameisterskap. På klubbnivå vart han seriemeister i fire ulike land: Sovjetunionen, Frankrike, Tyskland, Japan og vann EHF-cupen med SC Magdeburg. Kudinov var venstre rykkromspelar.

Vasilij Kudinov
Statsborgarskap	Russland
Fødd	17. februar 1969 Ilyinka
Død	11. februar 2017 (47 år) Astrakhan
Idrett	handball
Tok del i	Sommar-OL 2004, Sommar-OL 2000, Sommar-OL 1996, Sommar-OL 1992, Handball-VM 1993 for menn, Handball-VM 1997 for menn, Handball-EM 1996 for menn
Utmerkingar	Æresordenen, Idrettens mester i Sovjetunionen

Karriere

Klubbspel

Kudinov var frå 1987 til 1992 aktiv i Dynamo Astrakhan. Sidan gjorde han i fem år teneste for franske Ivry. Dei neste fire åra, 1997–2001, spelte han fyrst i tre år for tyske Hameln og så ein sesong i SC Magdeburg. Den eine sesongen i Magdeburg kom til å verte hans høgdepunkt som klubbspelar, med di laget gjekk til topps i bundesligaen og slo kroatiske Metković med store siffer i finalen i EHF-cupen. Deretter gjekk turen til japanske Honda Suzuka, før han avslutta med spel for Dynamo Astrakhan i 2004/5.

Landslagsspel

Kudinov debuterte på det sovjetiske landslaget i 1990. Med eks-Sovjetunionen vann han ein gullmedalje under Sommar-OL 1992 i Barcelona. Året etter vart han verdsmeister med Russland sitt landslag. Deretter var han med å tape finalen i EM 1994 og vinne finalane i EM 1996 og VM 1997. I to av desse tre siste finalane møtte han og lagkameratane hans Sverige til dyst. Også i VM 1999 og Sommar-OL 2000 var Sverige finalemotstandar. I VM-finalen sigra Sverige, OL-finalen i Sydney enda i triumf for Russland og Kudinov. Han avslutta medaljehausten med ein OL-bronse under sommarleikane 2004 i Aten.

Kudinov var toppskårar ved EM 1994. Han fekk plass på all-star-laget både då, og ved VM 1997 og VM 1999.

Merittar

• Sommar-OL 1992: Gullmedalje,
• VM 1993: Gullmedalje, 28–19 over Frankrike
• EM 1994: Sølvmedalje, 21–34 mot Sverige
• EM 1996: Gullmedalje, 23–22 mot Spania
• VM 1997: Gullmedalje, 23–21 mot Sverige
• VM 1999: Sølvmedalje, 24–25 mot Sverige
• Sommar-OL 2000: Gullmedalje, 28–26 mot Sverige
• Sommar-OL 2004: Bronsemedalje, 28–26 mot Ungarn
• Vinnar av EHF-cupen: 2001 for SC Magdeburg
• Sovjet-meister: 1990 for Dynamo Astrakhan
• Fransk seriemeister: 1997 for Ivry
• Fransk cupmeister: 1996 for Ivry
• Tysk ligameister: 2001 for SC Magdeburg
• Japansk seriemeister: 2002, 2003, 2004 for Honda Suzuka

Kjelder

• Denne artikkelen bygger på «Wassili Alexandrowitsch Kudinow» frå Wikipedia på tysk, den 14. april 2024.