Alfred Brendel

Alfred Brendel (fødd 5. januar 1931) er ein austerriksk konsertpianist, poet og forfattar. Brendel er fødd i Tsjekkoslovakia og er i dag britisk statsborgar.

Alfred Brendel
Fødd	5. januar 1931 (93 år)
Fødestad	Loučná nad Desnou, Wiesenberg
Opphav	Austerrike, Tsjekkoslovakia
Aktiv	1948–2008
Sjanger	klassisk musikk
Instrument	piano
Verka som	pianist, komponist, lyrikar, essayist
Born	Adrian Brendel
Prisar	Pour le Mérite für Wissenschaften und Künste, Knight Commander of the Order of the British Empire, Goldenes Ehrenzeichen für Verdienste um das Land Wien, Musikpreis der Stadt Duisburg, Praemium Imperiale, Léonie Sonnings musikkpris, Gramophone Award for Lifetime Achievement, Royal Philharmonic Societys gullmedalje, Herbert-von-Karajans musikkpris, Ernst von Siemens’ musikkpris, Robert Schumann Prize of the City of Zwickau, Hans von Bülow-medaljen, Frankfurter Musikpreis, Pour le Mérite, Echo Klassik Award - Instrumentalist of the Year, Critics' Circle Award for Distinguished Service to the Arts

Biografi

Alfred Brendel vart fødd i landsbyen Wiesenberg i Tsjekkoslovakia. Landsbyen heiter i dag Loučná nad Desnou og ligg i regionen Olomouc i Tsjekkia. Som seksåring flytte familien Brendel til Zagreb i det noverande Kroatia. Under andre verdskrigen budde dei i Graz i Austerrike. Fjortenårige Alfred Brendel vart då send til Jugoslavia for å grava skyttargraver, men då han vart frostskadd vart han send på sjukehus. Brendel hadde fått pianoundervisning frå han var seks år gamal, og frå han var 14 studerte han piano og komposisjon ved konservatoriet i Graz i to år. Som pianist var han likevel stort sett sjølvlært.

Etter andre verdskrigen tok Brendel til å spela piano, komponera og måla. 17 år gamal heldt han sin fyrste pianokonsert i Graz, der han framførte verk av J.S. Bach, Brahms og Liszt i tillegg til nokre av sine eigne komposisjonar. I 1949 vann han ei prestisjetung pianotevling i Italia, og året etter flytte han til Wien. Han laga si fyrste innspeling 21 år gamal; Sergej Prokofjev sin femte pianokonsert. I resten av karrieren har han gjort innspelingar av Beethoven, Schumann og Schubert. Ei av dei største innspelingsbragdene hans Brendel er at han spelte inn samtlege pianokonsertar av Mozart saman med kammerorkesteret Academy of St Martin in the Fields og dirigent Neville Marriner.

I byrjinga av 1970-åra flytte han til London, der han har vore busett sidan. Alfred Brendel har eitt barn frå fyrste ekteskapet sitt, og tre frå sitt andre. Ein av sønene frå hans andre ekteskap, Adrian Brendel er cellist og har gjort innspelingar saman med faren.

Som forfattar har Alfred Brendel gjeve ut fire diktsamlingar, og ei rekkje essay om ulike musikalske tema. I 2009 deltok han i den prisløna dokumentarfilmen Pianomania som handlar om ein pianostemmar for Steinway & Sons.

Prisar og utmerkingar (utval)

• Æresdoktor ved University of Oxford og Yale University.
• Deutscher Schallplattenpreis fleire år.
• 1972: Medlem av Royal Academy of Music.
• 1984: Frankfurter Musikpreis
• 1989: Utnemnd til Honorary Knight av Den britiske imperieordenen.
• 1991: Pour le Mérite for vitskap og kunst
• 1998: Æresmedlem av Wiener Philharmoniker
• 2002: Léonie Sonnings musikpris
• 2004: Ernst von Siemens' musikkpris
• 2005: Æresborgar av heimbygda Loučná nad Desnou i Tsjekkia
• 2008: Herbert von Karajans musikkpris
• 2009: Praemium Imperiale
• 2009: Æresdoktor ved Hochschule für Musik Franz Liszt Weimar
• 2009: Medlem av Deutsche Akademie für Sprache und Dichtung

Kjelder

• Denne artikkelen byggjer på «Alfred Brendel» frå Wikipedia på engelsk, den 16. mars 2012.
• Denne artikkelen byggjer på «Alfred Brendel» frå Wikipedia på tysk, den 16. mars 2012.