Chilensk Antarktis

Chilensk Antarktis (spansk Territorio Antártico Chileno) er kravområdet til Chile i Antarktis. Chilensk Antarktis strekkjer seg frå 53 °V til 90 °V og frå Sørpolen til 60°S, og overlappar delvis kravområda til Argentina og Storbritannia. Det vert styrt av Cabo de Hornos kommune på fastlandet i Sør-Amerika.

Villa Las Estrellas, den einaste busetnaden i Chilensk Antarktis, om kvelden

Antártica er namnet på kommunen som adminsitrerer territoriet. Kommunen Antártica vert styrt av kommunen Cabo de Hornos med sete i Puerto Williams heilt sør i Chile og hyører til Chilensk Antarktis, som er ein del av regionen Magallanes y la Antártica Chilena. Kommunen Antártica vart oppretta 11. juli 1961, og låg under provinsen Magallanes fram til 1975, då Chilensk Antarktis vart oppretta.

I følgje ei folketeljing i 2002 dekkjer Antártica eit område på 1 250 000 kvadratkilometer og har 130 innbyggjarar (115 menn og 15 kvinner). Dette omfattar ikkje personellet i dei ikkje-chilenske basane i området.

Den største busetnaden ligg på King George Island og består av Frei Montalva-stasjonen, som har ein flyplass (Teniente Rodolfo Marsh Martin Aerodrome, ICAO-kode SCRM), med samband til kommunesenteret, landsbyen Villa Las Estrellas.

I nærleiken ligg Professor Julio Escudero-basen, kontrollert av Det chilenske antarktiske instituttet (INACH), under Utanriksdepartementet. Dette er det chilenske hovudanlegget for vitskapleg utforsking av Antarktis.

Captain Arturo Prat-basen er ein chilensk forskingsbase i Antarktis på Greenwich Island. Denne opna 6. februar 1947 og er den eldste chilenske basen i Antarktis. Fram til 1. mars 2006 var han ein base for den chilenske marinen. Fram til februar 2004 var han fast bemanna, men har sidan berre vore bemanna om sommaren som base for meteorologisk og ionosfærisk forsking.

Den einaste permanente chilenske stasjonen på fastlandet i Antarktis (Den antarktiske halvøya), O'Higgins-basen, har vore i drift sidan 18. februar 1948. Han ligg på Puerto Covadonga.

Sesongbaserte chilenske basar

• Dr. Guillermo Mann-basen (tidlegare Shirreff-basen) 62°28′2″S 60°46′3″W; sommarbasen til Det chilenske antarktiske instituttet (INACH), på Livingston Island. Forskingsstasjon for vêr og økologi. Arkeologiske undersøkingar av tidlegaer selfangarar.
• Luis Risopatrón-basen 62°22′17″S 59°42′53″W; sommarbasen til Den chilenske marinen på Robert Island. Geodetisk, geofysisk og biologisk forskingsstasjon.
• Teniente Arturo Parodi Alister-basen 80°18′20″S 81°20′39″W; kjend som Patriot Hills-basen, er ein delvis permanent base. Basen ligg i Patriotfjella i Ellsworth Land. Basen vert driven av Det chilenske antarktiske instituttet og Det chilenske luftforsvaret for å studere glasiologi, meteorologi, geologi og kartlegging sidan 1996.
• Julio Ripamondi-basen 62°12′37″S 58°56′7″W; liten sommarbase for Det chilenske antarktiske instituttet (INACH), på Ardley Island, ved sidan av Frei Montalva-stasjonen og Professor Julio Escudero-basen (nær på King George Island). Ripamondi-basen driv forsking på geodesi og kartografi (sidan 1997), biologi (sidan 1988) og studiar av pingvinar (sidan 1988). Basen ligg nær ein stor koloni med eselpingvinar.
• González Videla-basen 64°49′26″S 62°51′27″W; base for Det chilenske luftforsvaret på det antarktiske fastlandet ved Waterboat Point i Paradise Bay. Han er i dag ein inaktiv base med drivstoff- og forsyningslaget for bruk i naudsituasjonar. Vert ofte vitja av chilenske vitskapsfolk og turistar om sommaren.
• Teniente Luis Carvajal Villaroel-basen (tidlegare Stasjon T) 67°46′25″S 68°53′36″W; base for Det chilenske luftforsvaret. Tidlegare var dette den britiske Stasjon T - Adelaide-basen, mellom 1961 og 1977. Basen vart overført til Chile i 1984 og kalla Teniente Carvajal. Chile har nytta stasjonen om sommaren sidan den gong.

Kjelder

• Denne artikkelen bygger på «Chilean Antarctic Territory» frå Wikipedia på engelsk, den 12. oktober 2012.
  • Wikipedia på engelsk oppgav desse kjeldene:

Bakgrunnsstoff

• Gobierno Regional Magallanes y Antártica Chilena Offisiell nettstad (spansk)
• Gobernación Provincia de Antártica Chilena Offisiell nettstar (spansk)
• Det chilenske antarktiske instituttet - offisiell nettstad (spansk)