Aryan Tari
Aryan Tari (fødd 4. juni 1999) er ein norsk sjakkspelar, stormeister i sjakk, junior-verdsmeister i sjakk i 2017. Han har blitt rekna som eit av dei største talenta i norsk sjakk, junior-noregsmeister allereie som 13-åring i 2012.[1] Tari vart internasjonal meister i sjakk (IM) berre 14 år gamal i 2013, og kvalifiserte seg for stormeister-tittelen i oktober 2015, berre 16 år gammal, som den 12. norske sjakkspelaren. Aryan Tari vart noregsmeister i sjakk i 2015 og 2019.
| Aryan Tari | |
|
| |
| Statsborgarskap | Noreg |
| Fødd | 4. juni 1999 (25 år) Noreg |
| Idrett | sjakk |
| Tok del i | Sjakkolympiaden 2014, Sjakkolympiaden 2016, Sjakkolympiaden 2018 |
Internasjonal meister i sjakk 2013
endreAryan Tari har gjort sterke resultat i mange internasjonale turneringar. I tre av dei var prestasjonane så gode at dei gav han dei nødvendige tre innteikningane i tittelen Internasjonal meister i sjakk: I den opne noregsmeisterskapen i sjakk på Fagernes i mars 2013 gjorde han eit stormeister-resultat med 6 poeng på 9 rundar, i Sveins minneturnering i Oslo i juni 2013 vart det IM-napp med 6 av 9, og i eliteklassa i NM i sjakk i Stavanger i juni-juli 2013 heldt 5 av 9 til det siste og avgjerande IM-nappet. Desse gode resultata var også nok til å få FIDE-rating pr 1. august 2013 på 2401, så då var også kravet om eigen rating over 2400 oppfylt. Han vart deretter utnemnd til Internasjonal Meister i sjakk (IM) av FIDE på kongressen i Tallinn i oktober 2013.[2].
Noregsmeister i sjakk
endreI Noregsmeisterskapen i sjakk i Oslo i juli 2015 tok Aryan Tari 7 poeng på 9 rundar, og vart med dette resultatet noregsmeister.[3] Han var då 16 år, og vart dermed den tredje yngste noregsmeisteren nokon gong. Berre Simen Agdestein og Magnus Carlsen var yngre, dei var 15 år då dei vann NM første gong. Aryan Tari vann også NM-tittelen i landsturneringa i Larvik i juli 2019, og har dermed to kongepokalar.
Stormeister i sjakk
endreAryan Tari tok sitt første stormeisternapp på Fagernes i mars 2013, som nemnt over. Han vart dermed den nest yngste norske spelaren som har klart stormeisternapp, berre Magnus Carlsen har vore yngre.
Aryan Tari klarte det andre stormeisterresultatet på ni runder under Europameisterskapen i sjakk for landslag i Reykjavik i oktober 2015, der han spelte på tredje bord på det norske laget, og tok 6 poeng. Spesielle FIDE-reglar for kontinentale lagmeisterskap gjer at dette vart rekna som eit stormeisterresultat over 20 parti. Desse to stormeisterresultata var dermed nok, og då kravet om eigen rating på over 2500 har vore oppfylt sidan mars 2015 vart han utnemnd til stormeister på FIDE-møtet i slutten av mars 2016.[4] Han vart då den 12. norske stormeisteren i sjakk.
Junior-verdsmeister i sjakk
endreAryan Tari vann junior-verdsmeisterskapen i sjakk for 2017 med 8,5 poeng på 11 rundar. Dette var same poengsum som to andre spelarar, men då Aryan Tari hadde vore i tetstriden i heile turneringa vart han tilkjent tittelen etter kvalitetberekning: Han hadde møtt sterkare motstand enn dei to andre. Meisterskapen vart spele i Tarvisio, Italia 13-25. november 2017.[5]
Kjelder
endre- Øystein Brekke: Norske sjakktrekk. Norges Sjakkforbund 100 år 1914-2014, Norges Sjakkforbund 2014, ISBN 978-82-991916-2-3
Kjeldeliste
endre- ↑ Brekke 2014 s. 305
- ↑ Tittelgodkjenningar på FIDE-kongressen 30. september - 10. oktober 2013
- ↑ Resultat Eliteklassa NM i sjakk 2015
- ↑ Tittelgodkjenningar FIDE Presidental Board 28-29.mars 2016
- ↑ Norsk Sjakkblad nr. 1 - 2018 side 6-13.