Ashia Hansen
Ashia Hansen, opphavleg Ashia Nana Koramdina, (fødd 5. desember 1971) er ein britisk tidlegare friidrettsutøvar som i 2002 vart europameister i tresteghopp.
| Ashia Hansen | |
| Statsborgarskap | Storbritannia |
| Fødd | 5. desember 1971 (52 år) Evansville |
| Idrett | friidrett |
| Tok del i |
Sommar-OL 2000, Sommar-OL 1996, Samveldeleikane 2002 |
| Utmerkingar |
medlem av Den britiske imperieordenen |
Aktiv endre
Hansen tok steget opp i verdseliten i tresteghopp i 1996-sesongen då ho med 14,49 meter enda på fjerdeplassen under OL i Atlanta. I 1997 vart ho nummer to i hall-VM med 14,70 m, bak russiske Inna Lasovskaja, og nummer fem med 14,49 m ved verdsmeisterskapen i Aten.
Våren 1998 hoppa Hansen 15,16 meter i hall-EM og sigra med ein margin på 40 centimeter til toaren i tevlinga, verdsmeister Šárka Kašpárková frå Tsjekkia. Også i hall-VM 1999 vann Hansen tresteghopp, då med 15,02 meter som best.
Etter å ha vorte nummer 11 i OL 2000 og nummer 7 i VM 2001, kom Hansen i 2002 tilbake i verdstoppen. Med 14,71 m tok ho andreplassen i hall-EM bakom Tereza Marinova frå Bulgaria. Deretter sigra Hansen i samveldeleikane 2002 med eit hopp på 14,86 meter, 4 centimeter lengre enn det Françoise Mbango Etone frå Kamerun oppnådde. Under europameisterskapen i München fekk Hansen hjelp av god medvind då ho landa på 15,00 m og sikra seg EM-gullet i sjette og siste omgang.
Ved hall-VM 2003 vann Hansen nok ein gullmedalje. Med 15,01 m slo ho Françoise Mbango Etone med 14 cm.
Medaljar og plasseringar i internasjonale meisterskap endre
- EM 1994 i Helsinki: Utslått i kvalifiseringa (13,45 m=nr 15)
- VM 1995 i Göteborg: Utslått i kvalifiseringa (13,61 m=nr 21)
- OL 1996 i Atlanta: Nr 4 – 14,49 m
- VM 1997 i Aten: Nr 5 – 14,49 m
- VM 1999 i Sevilla: Nr 12 – 13,39 m
- OL 2000 i Sydney: Nr 11 – 13,44 m
- VM 2001 i Edmonton: Nr 7 – 14,10 m
- EM 2002 i München: Gullmedalje – 15,00 m, framom Heli Koivula (14,83 m)
Kjelder endre
- Denne artikkelen bygger på «Ashia Hansen» frå Wikipedia på engelsk, den 21. juli 2020.