Charles Austin

Charles Allen Austin (fødd 19. desember 1967) er ein USA-amerikansk tidlegare friidrettsutøvar, fødd i Bay City i Texas, som vart verdsmeister i høgdehopp i 1991 og olympisk meister i 1996.

Charles Austin
Statsborgarskap	USA
Fødd	19. desember 1967 (57 år) Bay City
Idrett	friidrett
Tok del i	Sommar-OL 2000, Sommar-OL 1996, Sommar-OL 1992

Aktiv

Austin byrja med høgdehopp i 1986, mellom anna for å få eit idrettsstipend som sikra han plass ved universitet. Den 7. august 1991 sette han landsrekord med 2,40 m i Zürich, ein rekord som framleis gjeld, 25 år etter. Få veker etter rekordhoppet i Zürich vann han gullmedaljen under verdsmeisterskapen i Tokyo etter å ha svinga seg over 2,38 m som den einaste, verdsrekordhaldaren Javier Sotomayor vart nummer to. Dei neste sesongane heldt han ikkje same høge nivå, delvis grunna skadar.

Under Sommar-OL 1996 i Atlanta sette Austin ny olympisk rekord i høgdehopp då han tok seg over 2,39 m. Våren 1997 vann han høgdetevlinga i innandørs-VM etter ar han, som den einaste, klarte å klive over 2,35 m.

Austin vart USA-meister i høgdehopp seks år på rad. Han la opp i 2003.

Medaljar og plasseringar i internasjonale meisterskap

• VM 1991 i Tokyo: Gullmedalje – 2,38 m, framom Javier Sotomayor (2,36 m)
• OL 1992 i Barcelona: Nr 8 – 2,28 m
• VM 1995 i Göteborg: Utslått i kvalifiseringa (nr 13 – 2,27 m)
• OL 1996 i Atlanta: Gullmedalje – 2,39 m, framom Artur Partyka (2,35 m)
• VM 1997 i Aten: Utslått i kvalifiseringa (nr 13 – 2,26 m)
• VM 1999 i Sevilla: Nr 8 – 2,29 m
• OL 2000 i Sydney: Utslått i kvalifiseringa (nr 20 – 2,20 m)
• VM 2001 i Edmonton: Nr 9 – 2,20 m

Kjelder

• Denne artikkelen bygger på «Charles Austin» frå Wikipedia på engelsk, den 28. juli 2016.