Delikatesseforretning
Delikatessebutikk eller delikatesseforretning er ein butikk som sel visse delikatesser til forbrukarar. Ein slik butikk vil ofte ha eit utval ulike matvarer og ingrediensar, som ostar, fisk, kjøtprodukt, matoljer, salatar, sausar, sylteprodukt bakverk og søtsaker. Nokre stader kan delikatessebutikkane også selja vin og liknande. Delikatesseforretningar kan selja mat som er sjeldnare, dyrare, meir eksotisk og ofte meir tradisjonell enn det ein får i andre utsal. Ofte er matvarene lekkert vist fram i kjøledisk, på bord, hyller eller hengjande, og dei blir ofte delt opp og pakka inn av betjeninga, til skilnad frå sjølvbetening.
Ein del delikatessebutikkar har også servering, som ein tilknytt kafé. Stormagasin kan ha delikatesseavdelingar. Vidare har mange større supermarknader område som kan minna om delikatessebutikkar, som kjøt-, fisk- eller ostediskar.
På engelsk er ein delikatesseforretning ofte kjend som delicatessen, avleidd frå den tyske fleirtalsforma Delikatessen, eller forkortinga deli. I Nord-Amerika kan deliar fokusera på servering og/eller sal av mat til å ta med vekk, utan at matvarene nødvendigvis er rekna som delikatesser.
Kjelder
endre- Delikatesseforretning (14. februar 2009), Store norske leksikon. Henta 31. januar 2014.
- «delikatesseforretning» i Nynorskordboka.
- Delikatesse, Ordbog over det danske Sprog
- DELIKATESSEFORRETNING Arkivert 2014-02-22 ved Wayback Machine., tv2torget.no
- Delikatessebutikk Arkivert 2014-02-23 ved Wayback Machine., smag-behag.no
- Delikatessebutikken Arkivert 2014-02-22 ved Wayback Machine., lystpa.no
- SEPTEMBER – NY DELIKATESSEBUTIKK PÅ FROGNER, matmeg.no
- Delar av denne artikkelen bygger på «Delicatessen» frå Wikipedia på engelsk, den 5. februar 2014.
