Emma Green

Emma Anna-Maria Green (fødd 8. desember 1984) er ein svensk tidlegare friidrettsutøvar frå Göteborg som vann VM-bronse 2005, EM-sølv 2010 og EM-bronse 2012 i spesialøvinga høgdehopp.

Emma Green
Statsborgarskap	Sverige
Fødd	8. desember 1984 (39 år) Göteborg
Idrett	friidrett
Tok del i	Sommar-OL 2012, Sommar-OL 2008

Aktiv

Green overraska med å vinne bronsemedaljen i VM i friidrett 2005, der ho sette personleg rekord med 1,96 meter. Knappe to veker seinare forbetra ho seg til 1,97 m då ho vart svensk meister i Helsingborg, ein meisterskap der ho også vann lengdehopp på personleg rekord 6,41 meter. Sidan vann ho SM-gull i høgdehopp fem gongar i rad, 2007-11, og i 2013 og -14.

Green kom på sjuandeplass både under friidretts-VM 2007 og 2009. I EM i friidrett 2010 i Barcelona den 1. august overraska ho med å setje personleg rekord to gongar, fyrst med 1,99 m i tredje omgang, for så å ta seg over 2,01 meter i sitt andre forsøk på høgda. Rekordhoppet gav henne sølvmedaljen framom tyske Ariane Friedrich, vinnar vart Blanka Vlašić frå Kroatia som svinga seg over 2,03 meter.

I 2012 kom Green på ein tredelt bronseplass ved europameisterskapen i Helsinki med moderate 1,92 m. Ein tredjeplass fekk ho også i innandørs-EM i heimbyen Göteborg i mars 2013. Under Friidretts-VM 1997 i Moskva hoppa Green 1,97 meter og vart nummer fem, hennar nest beste plassering i ein verdsmeisterskap.

Green var elles ein dyktig sprintar med bestetider frå 2006-sesongen på høvesvis 11,58 sekundar på 100 meter og 23,02 på 200 meter. Ho var òg innom tresteghopp, ei øving der ho nådde 13,39 meter i 2007.

Medaljar og plasseringar i internasjonale meisterskap

• VM 2005 i Helsinki: Bronsemedalje – 1,96 m
• EM 2006 i Göteborg: Nr 11 – 1,92 m
• VM 2007 i Osaka: Nr 7 – 1,94 m
• OL 2008 i Beijing: Nr 9 – 1,96 m
• VM 2009 i Berlin: Nr 7 – 1,96 m
• EM 2010 i Barcelona: Sølvmedalje – 2,01 m, framom Ariane Friedrich (2,01 m)
• VM 2011 i Daegu: Nr 11 – 1,89 m
• EM 2012 i Helsinki: Bronsemedalje – 1,92 m
• OL 2012 i London: Nr 8 – 1,93 m
• VM 2013 i Moskva: Nr 5 – 1,97 m
• EM 2014 i Zürich: Nr 9 – 1,90 m

Kjelder

• Denne artikkelen bygger på «Emma Green» frå Wikipedia på svensk, den 17. juni 2019.

Bakgrunnsstoff

• «Emma Green-Tregaro» (på engelsk). Olympedia. Henta 5. mars 2023.