Gezahegne Abera

Gezahegne Abera (fødd 23. april 1978) er ein tidlegare langdistanseløpar frå Arsi-provinsen i Etiopia som i 2000 vart olympisk meister og i 2001 verdsmeister i maratonløping.

Gezahegne Abera
Statsborgarskap	Etiopia
Fødd	23. april 1978 (46 år) Oromiaregionen
Idrett	friidrett
Tok del i	Sommar-OL 2000

I 1999 vart Abera nummer 11 i VM i Sevilla, før han sprang inn til siger i Fukuoka maraton i Japan, ei maratontevling han også vann i 2001 og 2002. Våren 2000 enda Abera på andreplassen i Boston maraton. Hausten 2000 tok han teten i det olympiske maratonløpet etter 39 km, derifrå og inn til mål auka han leiinga til 20 sekundar mot Erick Wainaina frå Kenya som fekk sølv. Året etter kneip Abera gullmedaljen i maratonløpet ved verdsmeisterskapen i Edmonton i Canada, eitt einaste sekund framom Simon Biwott frå Kenya. I 2003 triumferte Abera i London maraton på tida 2.07.56.

Medaljar og plasseringar i internasjonale meisterskap

• VM 1999 i Sevilla: Nr 11 – 2.16.42
• OL 2000 i Sydney: Gullmedalje – 2.10.12, framom Erick Wainaina (2.10.31)
• VM 2001 i Edmonton: Gullmedalje – 2.12.42, framom Simon Biwott (2.12.43)

Kjelder

• Denne artikkelen bygger på «Gezahegne Abera» frå Wikipedia på engelsk, den 16. juni 2019.

• «Gezahgne Abera» (på engelsk). Olympedia. Henta 20. mars 2023.