Hanford-anlegga
Hanford-anlegga (engelsk Hanford Site) er eit stort, utrangert produksjonsanlegg for produksjon av plutonium til atombomber. Det vart bygd ved Columbiaelva under den andre verdskrigen i Hanford i staten Washington i USA, for produksjon. Anlegga vart seinare kraftig utvida med reaktoranlegg for produksjon av plutonium, uranisotopar og andre radioaktive nuklidar som blir nytta innan medisin, teknikk og forsking.
Området har vore kjend under mange namn, mellom anna Hanford Works, Hanford Engineer Works eller HEW, Hanford Nuclear Reservation eller HNR og Hanford Project. Anlegget kom i gang i 1943 og var ein del av Manhattanprosjektet. Her låg mellom anna den kjende B-reaktoren som stod for den første fullskalaproduksjonen av plutonium i verda.[1] Plutoniumet som vart produsert på staden vart brukt i den første atombomba, testa på Trinity site, og i «Fat Man», bomba som vart sleppt over Nagasaki i Japan.
Vatn frå Columbiaelva vart nytta til avkjøling av reaktorane. Sjølv om det vart noko reinska før det vart sleppt attende i elva, kom store mengder radioaktivt forureina vatn ut i elva kvar dag. Dette vart halde skjult av dei føderale styresmaktene.[2]
Kjelder
endre- ↑ «B Reactor». United States Department of Energy. Arkivert frå originalen 2. februar 2010. Henta 16. april 2013.
- ↑ «An Overview of Hanford and Radiation Health Effects». Hanford Health Information Network. Arkivert frå originalen 6. januar 2010. Henta 16. april 2013.
- Denne artikkelen bygger på «Hanford Site» frå Wikipedia på bokmål, den 16. april 2013.
- Wikipedia på bokmål oppgav desse kjeldene:
- «Hanford-anlegga». Store norske leksikon. 28. februar 2013.