Johannes Helleland
Johannes Olsson Helleland (10. desember 1840–3. februar 1913) var ein norsk lærar, ordførar og stortingsmann frå Ullensvang i Hordaland. Han var med i den store venstrerørsla, men gjekk over til Moderate Venstre og representerte dette partiet i den andre tingbolken.
| Johannes Helleland | |||
| Fødd | 10. desember 1840 Ullensvang | ||
|---|---|---|---|
| Død | 3. februar 1913 (72 år) | ||
| Statsborgar av | Noreg | ||
| Parti | Venstre (ingen; 1888), Moderate Venstre (1888) | ||
| Yrke | politikar | ||
| Alle verv |
| ||
Helleland var son av ein plassemann under garden Helleland. Åra 1857-61 var han krambudreng i Bergen, der han om søndagane gjekk på ein skule som gav undervisning i ymse fag. 1862-64 var han elev ved Stord seminar. Ei kort tid var han huslærar hos ein lege i Nordfjord, før han vart lærar på ein høgre jenteskule i Fredrikstad. Frå 1865 var han lærar i folkeskulen i Fredrikstad til han 1868 vart lærar på Birketvedt skule i Fjære. Året etter tok han til som lærar ved Ullensvang folkehøgskule, der han vart verande i 29 år. I tillegg var han kasserar for Ullensvang privatbank frå 1871. Helleland var medlem av heradsstyret frå 1878, ordførar 1880-95 og 1899-1904. Han var forlikskommissær 1881-90 og frå 1894 til han døydde.
Helleland møtte på Stortinget i 1885 frå 22. april. Han var i den valperioden, 1883-85, 2. varamann frå Søndre Bergenhus amt. Perioden 1889-91 var han 5. representant frå amtet. I 1885 var han medlem av næringskomite nr 2, 1889-91 av gasje- og pensjonskomiteen.
Han døydde i 1913 i heimen sin på Lofthus i Ullensvang.
Johannes Helleland var oldefar til stortingsrepresentant Trond Helleland (H).
Kjelder
endre- Lindstøl, Tallak: Stortinget og Statsraadet 1814-1914. Kristiania, 1914
- Biografisk informasjon om Johannes Helleland NSD Norsk senter for forskningsdatas politikararkiv