Keith Connor

Keith Leroy Connor (fødd 16. september 1957) er ein tidlegare friidrettsutøvar som tevla for Storbritannia i tresteghopp. Han vann gullmedaljen i øvinga ved EM 1982 i Aten og bronsemedaljen i same øving under OL 1984 i Los Angeles.

Keith Connor
Statsborgarskap	Storbritannia
Fødd	16. september 1957 (67 år) Anguilla
Idrett	friidrett
Tok del i	Sommar-OL 1984, VM i friidrett 1983, Samveldelekene 1978, Samveldelekene 1982, EM i friidrett 1978, EM i friidrett 1982, EM i friidrett innendørs 1978, Sommeruniversiaden 1981

Aktiv

Connor er fødd i Anguilla i Karibia, og flytta med foreldra til Storbritannia i 1964. Han vart samveldemeister i 1978 og 1982 med etter hopp på høvesvis 17,21 m og 17,81, det siste i for sterk medvind. I 1978 kom han elles på sjetteplassen i EM i Praha.

I juni 1982 sette Connor i Provo i Utah sin personlege rekord på 17,57 m. To månader seinare vart han europameister med eit bestehopp på 17,29 m. Under dei olympiske leikane i Los Angeles i 1984 fekk han ein bronsemedalje, i ei tevling der mange av dei beste tresteghopparane i verda ikkje stilte til start, då mange land, særleg austeuropeiske, boikotta leikane.

Skadar førte til at Connor la opp etter OL-sesongen 1984. Han har sidan arbeidd som trenar, mellom anna var han landslagssjef for Australia i perioden 2001-06.

Medaljar og plasseringar i internasjonale meisterskap

• EM 1978 i Praha: Nr 6 – 16,64 m
• OL 1980 i Moskva: Nr 4 – 16,87 m
• EM 1982 i Aten: Gullmedalje – 17,29 m
• VM 1983 i Helsingfors: Utslått i kvalifiseringa (16,18 m = nr 15)
• OL 1984 i Los Angeles: Bronsemedalje – 16,87 m

Kjelder

• «Keith Connor» (på engelsk). olympic.org. Henta 1. april 2017. 
• «Keith Connor» (på engelsk). Sports-Reference. Arkivert frå originalen 3. desember 2016. Henta 1. april 2017. 
• (en) Keith Connor – Profil på nettsida til IAAF

• Denne artikkelen bygger på «Keith Connor» frå Wikipedia på engelsk, den 19. april 2015.