Oddvar Nes

Oddvar Sigmund Nes (fødd 27. desember 1938 i Volda, død 18. september 2016) var ein norsk professor i nordisk språkvitskap, særleg nynorsk, ved Universitetet i Bergen.

Oddvar Nes
Statsborgarskap	Noreg
Fødd	27. desember 1938 Volda kommune
Død	18. september 2016 (77 år)
Yrke	lingvist
Medlem av	Det Norske Videnskaps-Akademi

Det meste av den faglege produksjonen til Oddvar Nes fell innom namnegranskinga, og han har særleg arbeidt med etymologiske spørsmål. Det kjem til uttrykk alt i magistergradsavhandlinga hans i germansk målvitskap, «Studiar i dei eldste nordvestlandske fjordnamna». Nes har vidare arbeidt med leksikografi, dialektar og fonetikk.

Saman med Jarle Bondevik og Terje Aarset har Oddvar Nes stått bak Ivar Aasen-selskapet, og dei tre har sidan 1992 stått føre eit omfattande vitskapleg arbeid med å gje ut dei etterlatne skriftene åt Ivar Aasen, med notar, innleiingar og kommentarar.

Oddvar Nes har vore namnekonsulent for fylkeskartkontora i Sogn og Fjordane og Hordaland, og var namnekonsulent for Vestlandet. Han har i tillegg vore redaktør for tidsskriftet Namn og Nemne (1984-2004).

Oddvar Nes var tilsett ved Universitetet i Bergen frå 1964 til han gjekk av ved aldersgrensa som 70-åring i 2008. Han fekk i 2009 kongens fortenestmedalje i sølv for innsatsen sin.

Litteratur

• Akselberg, Gunnstein og Jarle Bondevik (red.) 1998. «Ord etter ord. Heidersskrift til Oddvar Nes 27. desember 1998.» Bergen: Norsk Bokreidingslag.
• Nes, Oddvar. 2008. «Nes om namn. Heidersskrift til Oddvar Nes på 70-årsdagen 27. desember 2008.» Redigert av Gunnstein Akselberg og Ole-Jørgen Johannesen og med bibliografi redigert av Jarle Bondevik og Ole-Jørgen Johannesen. Bergen: Norsk Bokreidingslag.