Pavel Nedvěd
Pavel Nedvěd (fødd 30. august 1972) er ein tsjekkisk tidlegare fotballspelar frå Skalná i Karlovy Vary-regionen. Frå ein offensiv midtbaneposisjon hadde han suksess i heimlandet med Sparta Praha, og sidan med SS Lazio og Juventus i Italia. Nedvěd var elles sentral på det tsjekkiske landslaget då det var eit av Europas beste i åra før og etter 2000.
 Pavel Nedvĕd i 2006 | |||
| Personleg informasjon | |||
|---|---|---|---|
| Fullt namn | Pavel Nedvĕd | ||
| Fødd | 30. august 1972 (52 år) | ||
| Fødestad | Skalná i Tsjekkoslovakia | ||
| Høgd | 177 cm | ||
| Posisjon |
Ving Offensiv midtbanespelar | ||
| Seniorkarriere* | |||
| År | Lag | Kampar | (Mål) |
| 1990-1992 | Škoda Plzeň | 0 | (0) |
| 1990-1992 | → Dukla Plzeň (lån) | 19 | (0) |
| 1990 | Dukla Tabor | ||
| 1992-1996 | Sparta Praha | 97 | (23) |
| 1996-2001 | Lazio | 138 | (33) |
| 2001-2009 | Juventus | 247 | (51) |
| Totalt | 501 | (110) | |
| Landslag | |||
| 1992-1993 | Tsjekkoslovakia U-21 | 7 | (0) |
| 1996-2006 | Tsjekkia | 91 | (18) |
| * Seniorklubbkampar og mål berre telt for nasjonal liga | |||
Klubbspel
endreNedvěd slo gjennom med Sparta Praha, ein klubb han spelte på i tida 1992-96. Her var han med om å vinne tre nasjonale seriemeisterskap og eitt nasjonalt cupmeisterskap. Sidan var han Lazio-spelar i fem år, 1996-2001, der han vann både nasjonale cupen og serien. Den 19. mai 1999 vart han matchvinnar då Lazio slo Real Mallorca med 2-1 i den aller siste finalen i cupvinnarcupen, eit møte som fann stad på Villa Park i Birmingham. Våren 2003 leidde Nedvěd Juventus fram til Meisterliga-finale mot AC Milan. Grunna mange gule kort måtte han stå over finalen, ein kamp som enda med Juventus-tap. Seinare i 2003 vart han kåra til Årets spelar i Europa. Nedvěd var aktiv i Juventus til 2009. Han var såleis ein av dei spelarane som heldt fram i klubben, etter at klubben i 2006 vart frådømt seriepokalen og sendt ned i Serie B.
Landslagsspel
endreNedvěd deltok i 91 landskampar for Tsjekkia i tida 1994-2006. I hans tredje landskamp, Nedvěds fyrste heile kamp i landslagsdrakta, vann Tsjekkia i Praha 2-0 over Noreg og kneip EM-plassen framfor det norske mannskapet. Sommaren 1996 var Nedvěd var ein dei fremste på det tsjekkiske laget som nådde finalen i europameisterskapen i England, der Tsjekkia tapte EM-finalen på «golden goal» mot Tyskland. Fire år seinare rauk Tsjekkia ut or EM i fotball 2000 tidleg i leiken. Frå hausten 2000 var Nedvěd Tsjekkias lagkaptein i 40 kampar. Under Fotball-EM 2004 i Portugal tok Tsjekkia seg til semifinalane. I semifinalen mot Hellas vart Nedvěd kneskadd, og måtte gå av bana. Hellas vann 1-0 og seinare europa-pokalen, medan Nedvěd fekk plass på All Star-teamet i turneringa. I november 2005 var han på plass då Tsjekkia kvalifiserte seg til verdsmeisterskapen i Tyskland, etter to 1-0-sigrar over Noreg. Nedvěd deltok i alle tre VM-kampane til Tsjekkia i 2006, alle tre med tap. Gjennom 12 år skåra han 18 landslagsmål.
Merittar
endre- EM-sølv: 1996 med Tsjekkia
- Vinnar av cupvinnarcupen: 1999 med SS Lazio
- Tsjekkoslovakisk ligameister: 1993 med Sparta Praha
- Tsjekkisk ligameister: 1994 og 1995 med Sparta Praha
- Tsjekkisk cupmeister: 1996 med Sparta Praha
- Italiensk seriemeister: 2000 med Lazio, 2002 og 2003 med Juventus
- Italiensk cupmeister: 1998 og 2000 med Lazio
- Finaletap i meisterligaen: 2003 med Juventus
Kjelder
endre- Denne artikkelen bygger på «Pavel Nedvěd» frå Wikipedia på tysk, den 26. april 2019.