Plystresnipe
Plystresnipe (Tringa melanoleuca) er ein vadefugl i snipefamilien som hekkar i Nord-Amerika og overvintrar i den sørlege delen av Nord-Amerika, i Sentral-Amerika, Karibia og det meste av Sør-Amerika. Plystresnipa er den største av Tringa-snipene etter willetsnipa som er meir robust bygd.
| Plystresnipe | |
 Plystresnipe Foto: Michael L. Baird
| |
| Utbreiing og status | |
Status i verda:  Livskraftig Geografisk utbreiing
██ Berre hekking██ Trekk██ Overvintring
| |
| Systematikk | |
| Rike: | Dyr Animalia |
| Rekkje: | Ryggstrengdyr Chordata |
| Underrekkje: | Virveldyr Vertebrata |
| Klasse: | Fuglar Aves |
| Orden: | Vade-, måse- og alkefuglar Charadriiformes |
| Familie: | Snipefamilien Scolopacidae |
| Slekt: | Tringa |
| Art: | Plystresnipe T. melanoleuca |
| Vitskapleg namn | |
| Tringa melanoleuca | |
Skildring
endreDette er ei stor snipe i denne slekta, ho varierer i lengd frå 29 til 33 centimeter og i vekt mellom 111 og 235 gram. Vaksne individ har lange, gule bein og eit langt, tynnt, mørk nebb, lengre enn hovudet. Nebbet er rett eller nesten umerkeleg oppbøygd. Kroppen er gråbrun på oversida og kvit på undersida. Overgumpen er kvit. I hekkedrakta er halsen og brystet og kroppssidene smykka med kraftige, gråsvarte flekker, utanom hekkesesongen er flekkene meir utvaska og mindre synlege på undersida og flankane. Vinterdrakta har òg lysare, brun overside. Arten har eit repertoar av læte, ein vanleg song er skildra som kontinuerlige, rullande, melodiøse tonar 'tu-vii', 'tu-vii'.[1]
Det vidtrekkande utbreiingsområdet inkluderer sørlege Alaska og eit belte frå Britisk Columbia og tvers over provinsane i Canada, sørom Hudsonbukta, til Newfoundland og Labrador. Hekkehabitata er på myrar med kratt og spreidde småvaksne tre, generelt ganske flatt. Her vel dei reirplassen på bakken, vanlegvis godt gøymt ved eller under eit tre, i nærleiken av vatn. Dei fire (3-5) egga blir ruga i ca. 23 dagar og ungane kan ta til med å flyge etter 25 dagar.
Overvintringsområdet er særs vidtrekkande og inkluderer både atlanterhavskysten og stillehavskysten av USA, kystane av Mexicogolfen, Florida, Sentral-Amerika, Karibia og gjennom Sør-Amerika til Tierra del Fuego. Dei er svært sjeldne streiffuglar til Vest-Europa. Plystresnipene beitar på grunt vatn, om vinteren er habitata mykje varierte og kan inkludere tørrare område med bekkar og små dammar. Dietten er basert på smådyr som krepsdyr, småfisk, børstemark, vasslevande insekt, grashopper, maur og fluger og anna. I Alaska er det observert sniglar og trepigga stingsild i dietten.
Storleiken på populasjonen er usikker, men har vore estimert til 137 000 individ og er trudd å vere stabil.[1]
Kjelder
endre- Denne artikkelen bygger på «Greater Yellowlegs» frå Wikipedia på engelsk, den 16. juli 2016.
- Referansar
- ↑ 1,0 1,1 Van Gils, J., Wiersma, P. & Kirwan, G.M. (2016). Greater Yellowlegs (Tringa melanoleuca) I: del Hoyo, J., Elliott, A., Sargatal, J., Christie, D.A. & de Juana, E. (eds.) (2016). Handbook of the Birds of the World Alive. Lynx Edicions, Barcelona. Henta den 16. juli 2016
Bakgrunnsstoff
endre
Wikimedia Commons har multimedia som gjeld: Plystresnipe
- BirdLife International (2016) Species factsheet: Tringa melanoleuca Arkivert 2015-09-14 ved Wayback Machine.. Henta frå http://www.birdlife.org den 16. juli 2016
- Greater Yellowlegs (Tringa melanoleuca) Audubon Guide to North American Birds, henta 16. juli 2016