Songen Wish You Were Here

Wish You Were Here Song av Pink Floyd frå albumet Wish You Were Here

Språk	engelsk
Utgjeve	15. september 1975
Innspelt	Januar - juli 1975
Sjanger	Progressiv rock, rock
Lengd	5:40
Selskap	Harvest, EMI (UK) Columbia, Capitol (US)
Komponist	David Gilmour, Roger Waters
Tekstforfattar	David Gilmour, Roger Waters
Låtskrivar(ar)	Roger Waters, David Gilmour
Produsent	Pink Floyd

Pink Floyd-kronologi
Wish You Were Here EP Singel av Pink Floyd frå albumet PULSE

B-side	«Coming Back to Life» (live), «Keep Talking» (live)
Språk	engelsk
Utgjeve	20. juli 1995
Innspelt	20. september (Rome); 13. og 20. oktober (Earls Court, London), 1994
Sjanger	Progressiv rock
Selskap	Capitol Records (US) EMI (UK)
Komponist	David Gilmour, Roger Waters
Tekstforfattar	David Gilmour, Roger Waters
Låtskrivar(ar)	Waters, Gilmour
Produsent	James Guthrie, David Gilmour
«High Hopes» (1994)	Wish You Were Here EP

«Wish You Were Here» er ein song av det britiske bandet Pink Floyd, og er tittelsporet på albumet med same namn frå 1975. Musikken er skrive av David Gilmour og Roger Waters, medan Waters skreiv teksten, som referer til Pink Floyd sin tidlegare frontfigur Syd Barrett.

Komposisjon

Songen opnar med lyden av nokon som skiftar kanalar på ein radio, og songen glir over frå «Have a Cigar», som sluttar på same vis. Gilmour spelar gitarriffet i introduksjonen på ein akustisk gitar med tolv strengar, og lyden høyrest ut som den kjem ut frå ein gamal transistorradio, før meir fyldigare lyd legg seg oppå. Denne delen av songen vart miksa slik at det høyrdest ut som gitaristen sit i eit rom og spelar i lag med radioen, og ein kan i tillegg høyre eit svakt kvin, som om ein har med radiostøy. Introriffet vert repetert fleire gonger i songen, mellom anna når Gilmour spelar gitarsolo i lag med scatsynginga hans. Mot slutten av songen forsvinn musikken gradvis inn i lyden av vind, før han glir rett over i siste del av «Shine on You Crazy Diamond».

Andre utgåver

«Wish You Were Here» vart gjeve ut på samleplatene A Collection of Great Dance Songs og Echoes.

Konsertutgåver av songen vart gjeve ut på både Delicate Sound of Thunder og P*U*L*S*E, og den siste versjonen vart i tillegg gjeve ut på singel i 1994.

«Wish You Were Here» vart først spelt på konsertar under turnéen i 1977, i lag med resten av albumet. På enkelte av desse konsertane brukte Mason ein verkeleg transistorradio i starten av songen. Deretter vart songen spelt på så godt som alle konsertane av Pink Floyd frå 1987 til 1994. I tillegg vart songen spelt på soloturnéane til Waters og Gilmour, og ein versjon vart gjeve ut på Waters sitt konsertalbum In the Flesh i 1999.

Medverkande

David Gilmour – solo- og harmonivokal, scat-synging, 6- og 12-strengs akustisk gitar, pedalsteelgitar, lydbandeffektar
Nick Mason – trommer, lydbandeffektar
Roger Waters – bass, lydbandeffektar
Richard Wright – Steinway piano, Minimoog

Salslister

Liste (1995 - konsertversjon)	Plassering
US Billboard Hot Mainstream Rock Tracks^[1]	13

Liste (2007)	Plassering
Noreg (VG-lista)^[2]	18

Liste (2012)	Plassering
Austerrike (Ö3 austerriksk Topp 40)^[3]	48
Frankrike (SNEP)^[4]	192
Tyskland (Media Control AG)^[5]	67
UK Singles (Official Charts Company)^[6]	68

Coverversjonar

Mange artistar har spelt denne songen i etterkant, mellom anna Sparklehorse (i lag med Thom Yorke frå Radiohead), The Flaming Lips, Wyclef Jean, Catherine Wheel and Rasputina.

Songen vart framført under avslutningsseremonien til sommar-OL 2012 i London av Ed Sheeran i lag med Nick Mason på trommer og Mike Rutherford på gitar.

Fakta

Heilt på slutten av songen kan ein så vidt høyre ein fiolin spelt av Stephane Grappelli. Han var i eit anna studio på denne tida, og Gilmour føreslo at dei trengde litt «countryfele» på slutten. Motvillig spelte Grappelli inn ein liten snutt, men til slutt vart svært lite av dette tatt med. Bandet valde derfor å ikkje kredittere han i omslaget.
Stemmene og orkestermusikken mellom «Have a Cigar» og «Wish You Were Here» vart tatt tilfeldig frå ein lokal radiostasjon. Musikken inkluderer eit klipp av Tsjajkovskij sin fjerde symfoni, eit radiohøyrespel, og så gitarriffet.