Tatjana Kotova
Tatjana Vladimirovna Kotova (fødd 11. desember 1976) er ein russisk tidlegare friidrettsutøvar, fødd i Kokand i Usbekistan, som deltok internasjonalt i lengdehopp. Ho vart europameister i øvinga i 2002, og vann også fleire sølv- og bronsemedaljar i internasjonale meisterskap. Eit VM-sølv ho tok i 2005 vart annulert i 2013.
| Tatjana Kotova | |
|
| |
| Statsborgarskap | Sovjetunionen, Russland |
| Fødd | 11. desember 1976 (47 år) Kokand |
| Idrett | friidrett |
| Tok del i | Sommar-OL 2008, Sommar-OL 2004, Sommar-OL 2000 |
Aktiv
endreKotova høyrde til verdseliten i lengdehopp gjennom heile det fyrste tiåret av 2000-talet. Det internasjonale gjennombrotet kom då ho vart verdsmeister innandørs 1999 etter å ha landa på 6,86 m. Året etter hoppa ho 6,83 m under Sommar-OL i Sydney, eit resultat som heldt til fjerdeplass. Same sesongen lukkast ho vinne gullpotten i den såkalla Golden League-turneringa, som den fyrste lengdehopparen.
Ved innandørs-VM 2001 hoppa ho 6,98 m og tok sølvmedaljen. Same medaljevalør fekk ho utandørs i VM i Edmonton, der ho i medvind hoppa 7,01 m, ein centimeter bak gullvinnaren Fiona May. Året etter vann Kotova gullmedaljen under EM 2002 i München. Seinare i same sesongen sette ho personleg rekord med 7,42 m.
I 2003 forsvarte Kotova VM-tittelen innandørs, medan ho i utandørs-VM i Paris tok ein ny sølvmedalje. Endå ein sølvmedalje fekk ho i innandørs-VM 2004 i Budapest, og seinare same året tok ho bronse under Sommar-OL i Aten. Nok ein sølvmedalje fekk ho tildelt då VM 2005 gjekk av stabelen i Helsinki. Våren 2006 sikra Kotova seg si tredje gullmedalje i eit innandørs-VM etter siger i lengdehopptevlinga i Moskva.
Kotova deltok også i VM i Osaka 2007, der 6,90 m heldt til bronse etter lagvenninnene Tatjana Lebedeva og Ljudmila Koltsjanova. Ho deltok også i OL 2008, men vart overraskande utslått i kvalifiseringa.
Doping
endreUrinprøvene frå friidretts-VM 2005 i Helsinki vart testa på nytt i 2013, med nyutvikla metodar. Ein fann då spor av ulovlege dopingmidlar i prøvene til Kotova, noko som førte til at ho vart diskvalfisert frå sølvmedaljen ho tok i same meisterskapen.
Medaljar og plasseringar i internasjonale meisterskap
endre- VM 1999 i Sevilla: Utslått i kvalifiseringa (6,62 m =nr 13)
- OL 2000 i Sydney: Bronsemedalje – 6,83 m
- VM 2001 i Edmonton: Sølvmedalje – 7,01 m, bakom Fiona May
- EM 2002 i München: Gullmedalje – 6,85 m, framom Jade Johnson (6,73 m)
- VM i 2003 i Paris: Sølvmedalje – 6,74 m, bakom Eunice Barber (6,99 m)
- OL 2004 i Aten: Bronsemedalje – 7,05 m
- VM i 2005 i Helsinki: Sølvmedalje – 6,79 m (annullert i 2013)
- VM 2007 i Osaka: Bronsemedalje – 6,90 m
- OL 2008 i Beijing: Utslått i kvalifiseringa (6,57 m =nr 13)
- EM 2010 i Barcelona: Utslått i kvalifiseringa (6,48 m =nr 18)
Kjelder
endre- Denne artikkelen bygger på «Tatjana Wladimirowna Kotowa» frå Wikipedia på tysk, den 7. juni 2015.