Verdsorganisasjonen for helse

Verdsorganisasjonen for helse (engelsk World Health Organization – WHO, fransk Organisation mondiale de la santé – OMS) er eit av dei spesialiserte organa til Dei sameinte nasjonane. På norsk blir ofte den engelske forkortinga WHO nytta.

Verdsorganisasjonen for helse
Skipa	7. april 1948
Morselskap	Dei sameinte nasjonane
Hovudkontor	Genève
Land	Sveits
Nettstad	https://www.who.int (engelsk)

Flagget til Verdsorganisasjonen for helse.

Organisasjonen har 192 medlemsland (2006). Dette inkluderer alle medlemslanda i SN, med unnatak av Liechtenstein. Hovudsetet ligg i Genève i Sveits.

Formål

Formålet til Verdsorganisasjonen for helse er å arbeide for at alle folk skal ha så god helse som mogleg. Helse blir i denne samanhengen definert som ein tilstand av full fysisk, mental og sosial velvære, ikkje berre fråvær av sjukdom eller svakheit.

Arbeidsområda til WHO spenner frå å kjempe mot infeksjonssjukdommar til kampanjar for å auke inntaket av grønsaker og mot bruk av tobakk. WHO forskar dessutan mykje på helseverknader.

Historie

Organisasjonen vart oppretta 7. april 1948. Han tok da over store delar av mandatet og ressursane til Helseorganisasjonen (engelsk Health Organization), som hadde vore eit organ under Folkeforbundet.

Generaldirektørar

Sidan starten har det vore seks ulike generaldirektørar i WHO. Den tidlegare norske statsministeren Gro Harlem Brundtland var generaldirektør i perioden mellom 1998 og 2003.

Namn	Land	Tidsperiode
Margaret Chan	Hong Kong	2006– (framleis)
Anders Nordström	Sverige	2006– (fungerande etter dødsfallet til Lee Jong-wook)
Lee Jong-wook	Sør-Korea	2003–2006
Gro Harlem Brundtland	Noreg	1998–2003
Hiroshi Nakajima	Japan	1988–1998
Halfdan T. Mahler	Danmark	1973–1988
Marcolino Gomes Candau	Brasil	1953–1973
Brock Chisholm	Canada	1948–1953

Bakgrunnsstoff

• Offisiell nettstad