Aristoteles Onassis
| Aristoteles Onassis | |
 | |
| Statsborgarskap | Hellas, Argentina |
| Fødd | 20. januar 1906 İzmir |
| Død |
15. mars 1975 (69 år) |
| Yrke | reiar, forretningsdrivande, gründer |
| Språk | nygresk, engelsk |
| Far | Socrates Onassis |
| Mor | Penelope Dolagu |
| Ektefelle | Athina Livanos, Jacqueline Kennedy Onassis |
| Partnar | Maria Callas |
| Aristoteles Onassis på Commons | |
Aristoteles Sokratis Onassis (gresk: Αριστοτέλης Ωνάσης, Aristotélis Onásis) (20. januar 1906–15. mars 1975) var ein gresk skipsreiar og entreprenør. Han skipa òg det greske flyselskapet Olympic Airways i 1957.
Liv og virke
endre
Bakgrunn
endreAristoteles Onassis vart fødd i Smyrna i Det osmanske riket (noverande Izmir) og emigrerte som 16-åring statslaus med Nansenpass med familien til Argentina etter den første verdskrigen. Til å byrja med arbeidde han i ein telefonveksel.
Karriere
endreMed tida avanserte han til gresk generalkonsul, og hadde etter berre nokre få år vorte dollarmillionær ved handel med råtobakk og deretter ved å investera pengane i fartøy. Han gav seg dermed inn i reiarverda.
I Argentina bygde han seg etter kvart opp som skipsreiar, ikkje minst innanfor kvalfangst; der han hadde nær kontakt med norske skipsreiarar, mellom andre Anders Jahre og Erling Dekke Næss. I den tidlegare bustaden til Jahre i Midtåsen i Sandefjord ligg «Onassis-suiten» i andre etasje, som fekk namnet etter at Aristoteles Onassis ein gong overnatta her, og lystbåten til Jahre, «Jacqueline», var oppkalla etter kona til Onassis, Jacqueline Kennedy Onassis.
Etter den andre verdskrigen brukte Onassis høva som baud seg ved behov for ny tonnasje og ekspanderte ytterlegare. I 1954 vart han etterforska for skattesvik av FBI og gjekk med på eit forlik der han betalte 7 millionar amerikanske dollar.
Etter andre verdskrigen kjøpte Onassis ein utrangert kanadisk fregatt, pussa han opp og brukte han som den private lystyachten sin. Yachten «Christina O», namngjeven etter dottera Christina Onassis, var eit midtpunkt for verdssosieteten på 1950-talet, og kjende personlegdomar som Winston Churchill, John F. Kennedy og Marilyn Monroe var gjestar ombord.
Onassis levde i mange år saman med operasongaren Maria Callas. Den 20. oktober 1968 gifta Onassis seg med Jaqueline Kennedy, enka etter den myrda presidenten John F. Kennedy, og han var gift med ho til han døydde. Sidan den einaste sonen til Onassis hadde omkome, var einearvinga hans dottera Christina Onassis, og etter ho døydde var dottera hennar, Athina Onassis einaste arvtakar.
Onassis døydde etter fleire års sjukdom av lungebetennelse i 1975 i Neuilly-sur-Seine utanfor Paris i Frankrike.
Kjelder
endre- Denne artikkelen bygger på «Aristoteles Onassis» frå Wikipedia på bokmål, den 22. juli 2020.
- Wikipedia på bokmål oppgav desse kjeldene:
Litteratur
endre- Foustanos, George M. (2006): Onassis: Pioneer in Shipping, Argo. ISBN 978-9608940000