Ingelbrecht Knudssøn
Ingelbrecht Knudssøn (14. desember 1776–21. mars 1826) var ein norsk embetsmann og stortingsmann.
| Ingelbrecht Knudssøn | |||
 | |||
| Fødd | 14. desember 1776 Byneset kommune | ||
|---|---|---|---|
| Død | 21. mars 1826 (49 år) | ||
| Statsborgar av | Noreg | ||
| Yrke | politikar, embetsmann, jurist | ||
| Utdanna ved | Københavns Universitet | ||
| Medlem | Det Kongelige Norske Videnskabers Selskab | ||
| Alle verv |
| ||
Liv
endreIngelbrecht Knudssøn var fødd på garden Brensel på Byneset i Sør-Trøndelag, der far hans var gardbrukar. Seksten år gammal vart han tilsett på kontoret til tollkasserar Møller i Trondheim. Der arbeidde han i tre år, så eitt år hos sorenskrivaren i Strinda og Selbu, deretter sju år på by- og rådstuskrivarkontoret i Trondheim.
I desse åra studerte han på eiga hand, og i juni 1803 la han i veg til København. I mai året etter tok Ingelbrecht Knudssøn juridisk embetseksamen «med særdeles berømmelse». Frå 1804 og utover arbeidde han fyrst som amtsfullmektig i Sorø, sidan advokatfullmektig i København og til sist prokurator.
År 1810 overtok Knudssøn sorenskrivarembetet for Aust- og Vestfinnmarken. Fem år seinare vart han sorenskrivar i Romsdal og byfut i Molde. 1821 var han tilbake i Strinda og Selbu, då som sorenskrivar.
Ingelbrecht Knudssøn vart vald inn på stortinget i 1818 som representant for bykrinsen Kristiansund og Molde, sameleis i 1821 (og dermed det overordentlege storting 1822). På stortinget 1824 representerte han Trondheim. I 1818 var han medlem av tolv komitear, formann i i komiteen om overformynderiet. 1821 var han stortingspresident og odelstingspresident. Elles var han då med i 19 komitear, i seks av desse var han formann. Komiteane han leia, forhandla om; a) kjøpstadskatten, b) tiend, c) russefisket i Finnmarken, d) russehandelen i Finnmarken, e) konsulatavgift i Helsingør, og f) vinterpost til Finnmarken over Haparanda. I 1824 var han president i Odelstinget og visepresident i Stortinget. Han var då formann i reglementkomiteen og i protokollkomiteen.
Etter Knudssøn døydde, utfordra borgarar i Trondheim gjennom ein subskripsjon å kome familien hans til hjelp, samt for å heidre minnet hans. Midlar for over 18000 kroner kom inn. Eit restbeløp på i kring 2000 kroner vart 1845 skjenka universitetet, som oppretta eit legat for studentar som hadde trong for økonomisk stønad.
Han ligg gravlagt på sørsida av Vår Frue kyrkje i Trondheim der gravplata framleis er synleg.
Kjelder
endre- Lindstøl, Tallak (1914). «Knudssøn, Ingelbrecht». Stortinget og statsraadet: 1814-1914. B. 1 D. 1 : Biografier A-K. Kristiania: [Steen'ske bogtrykkeri]. s. 489–490.
- Biografisk informasjon om Ingelbrecht Knudssøn NSD Norsk senter for forskningsdatas politikararkiv