Johan Buttedahl
Johan Buttedahl (fødd 5. oktober 1935) er ein norsk tannlækjar og politikar, fødd i Drammen. Han var stortingsrepresentant frå Buskerud og for Senterpartiet i tida frå 1981 til 1989, parlamentarisk leiar 1983-89. Perioden 1983 til -87 var han nestformann i Senterpartiet.
| Johan Buttedahl | |
| Statsborgarskap | Noreg |
| Fødd | 5. oktober 1935 (89 år) Drammen kommune |
| Yrke | politikar, tannlege |
| Språk | norsk |
| Politisk parti | Senterpartiet |
Far til Buttedahl var gardbrukar. Sjølv gjekk han Gjerdes Handelsskole i Drammen i 1954 og befalsskulen til Hærens Transportkorps og Hærens Intendantur i 1955. I 1958 byrja han studere odontologi, og vart i 1964 cand.odont. etter å ha studert i Bonn og i Bergen. Sidan var han distriktstannlækjar 1964-66 i Brøstadbotn i Troms, og 1966-81 i Hokksund i Buskerud.
Buttedahl var medlem av formannskapet i Øvre Eiker frå 1972 til 1981. 1980-81 var han fylkestingsmedlem i Buskerud. Hausten 1981 vart han vald inn på Stortinget for Senterpartiet i Buskerud. På Stortinget var han sekretær i Sosialkomiteen til juni 1983. Då Senterpartiet i dei dagar gjekk inn i Willoch-regjeringa, vart han flytta over i Utanriks- og konstitusjonskomiteen, der han var medlem til han i 1989 sa farvel til Tinget. Partiformannen Johan J. Jakobsen var ein av dei som då vart statsråd, så etter at Buttedahl om våren 1983 hadde vorte vald til nestformann i Senterpartiet, var det naturleg at han tok over som parlamentarisk leiar i Stortinget, eit verv han hadde til han slutta som tingmann.
Buttedahl var frå 1989 til 2001 fylkestannlækjar i Buskerud. Jamsides var han medlem i Forsvarskommisjonen av 1990, nestleiar 1994-2001 i Kringkastingsrådet, riksrevisor og nestleiar 1994-98 i Riksrevisjonen og 1997-2004 ordførar i representantskapet i Selskabet for Norges Vel.