Johan Peter Trøite
Johan Peter Nilsson Trøite (22. mars 1880–14. mars 1977) var ein norsk gardbrukar og politikar frå Hegra i Nord-Trøndelag. Han representerte valkrinsen Nord-Trøndelag og partiet Venstre på Stortinget 1934-35 og 1937-45. Perioden 1938-41 og i 1945 var han ordførar i Hegra.
| Johan Peter Trøite | |||
 | |||
| Fødd | 22. mars 1880 Hegra | ||
|---|---|---|---|
| Død | 14. mars 1977 (96 år) | ||
| Statsborgar av | Noreg | ||
| Parti | Venstre | ||
| Yrke | politikar, bonde | ||
| Utdanna ved | Noregs miljø- og biovitskaplege universitet | ||
| Alle verv |
| ||
Trøite tok over slektsgarden i 1908 og dreiv garden til eldste sonen tok over i 1947. Gjennom desse tiåra utvikla han garden ved å dyrke nytt land og kjøp av skog.
Trøite var medlem av heradsstyret i Hegra frå 1917 til 1945, med unnatak for den NS-styrte perioden under andre verdskrigen. Han var ein periode varaordførar og ordførar 1938-41 og 1945. Fyrste gongen kom han inn i heradsstyret ved fleirtalsval, deretter på jordbrukarlister. Frå og med 1925 stilte han som Venstre-mann.
Perioden 1934-46 var Trøite vararepresentant til Stortinget for Venstre Etter at Torgeir P. Lund døde i mai 1934, møtte Trøite i Finans- og tollkomitéen fram til mars 1935. Frå 1937 var Trøite stortingsrepresentant med plass i Landbrukskomitéen. I 1941 vart Trøite avsett som ordførar av okkupasjonsstyret. Den 9. mai 1945 fekk han tilbake ordførarvervet, og sat i posisjonen ut året.
Trøite hadde ei rekke tillitsverv innom skogdrift og elektrisitetsproduksjon. Han var såleis styreformann og driftsstyrar 1913-24 ved Hegra elektrisitetsverk, styremedlem i Nord-Trøndelag Elektrisitetsverk og formann i Sør-Trøndelag Tømmermåling. Elles var han styreformann 1925-35 ved Inntrøndelag Husmorskole, styreformann i AS Bøndernes Hus i Trondheim og styremedlem 1920-40 i AS Follafoss Tresliperi.