Johannes Vold

Johannes Vold (fødd 12. mai 1945) er ein tidlegare fotballspelar frå Vigrestad i Rogaland. Han var angrepsspelar, seriemeister 1972 og 1973 med Viking Fotballklubb.

Johannes Vold
Statsborgarskap	Noreg
Fødd	12. mai 1945 (79 år) Noreg
Idrett	fotball

Karriere

Klubbspel

Vold melde seg inn i Bryne FK hausten 1961. Fram til 1970 var han aktiv i fyrst 3. divisjon og frå 1965 i 2. divisjon. Både i 1968 og 1969 var han toppskårar i avdeling A. Åra 1971-73 var han Viking-spelar. Etter seriebronse i 1971 var han med om å vinne 1. divisjon i 1972 og 1973. Med høvesvis 15 og 11 nettkjenningar var han sesongane 1972 og -73 laget sin toppskårar i serien. Vold avslutta si tid som aktiv med spel for tredjedivisjonslaget Vigrestad IK i åra 1974 til -76.

Landslagsspel

Vold spelte 3 landskampar i juni og juli 1973. Etter 1–1 mot Irland på Ullevaal stadion 6. juni 1973, vart det tap mot Danmark i København. Den 25. juli skåra han det fyrste målet då Nord-Korea vart slått 3–0 på Brann stadion i Bergen, Tor Egil Johansen og Svein Kvia skåra dei hine måla.

Merittar

• Seriemeister 1972 og 1973 med Viking
• Seriebronse 1971 med Viking

Kjelder

• eu-football