Per Stavem

Per Johan Stavem (1. mars 1926–24. september 2006) var ein lege, flygar og friidrettsutøvar frå Nordland. Han var busett i Bærum.

Per Stavem
Statsborgarskap	Noreg
Fødd	1. mars 1926 Sortland kommune
Død	24. september 2006 (80 år) Oslo
Idrett	friidrett
Tok del i	Sommar-OL 1948, Sommar-OL 1952

Liv og gjerning

Yrke

Stavem var fødd og oppvaksen i Sigerfjord i Sortland. I 1942 flykta han ut av landet til Göteborg og vidare over Færøyane til England. I England utdanna han seg til flygar ved flyskulen til Flyvåpenet. Frå oktober 1944 til 1951 var han jagarflygar i Forsvaret. Han byrja studere medisin og vart cand.med. i 1952 og dr.med i 1966. Frå 1966 til 1995 var han høvesvis assistentlege, dosent, overlege og professor ved hematologisk seksjon på Rikshospitalet. Han var spesialist i indremedisin frå 1965 og blodsjukdomar frå 1986.

Idrett

Stavem var aktiv friidrettsmann. Han deltok i sommar-OL 1948 i London, der han vart nummer elleve i tikampen med 6 151 poeng. Både i 1951 og 1952 vart han noregsmeister i kulestøyt, i 1952 også i lengde utan tilløp. I 1952 vart han nummer åtte i kulestøyt med ny norsk rekord på 16,02 meter i finalen under sommarleikane i Helsingfors. Han vart elles nummer 16 i diskoskast med 46,00 meter i dei same leikane. Stavems personlege rekord i diskoskast var 47,49 meter, sett i september 1951 på nettop den same OL-arenaen. Stavem var aktiv i veteranklassar heilt fram til han døydde.

Medaljar i norske meisterskap

• 1951: Gull i kule – 15,00 m, framom Bjarne Engen (13,98 m)
• 1952: Gull i kule – 15,06 m, framom Sverre Øverby (13,87 m), og bronse i diskos (46,11 m)
• 1956: Sølv i kule – 15,16 m, bakom Sverre Øverby (15,93 m)

Ymse

Stavem var oppteken av språk, og som pensjonist ga han ut to diktsamlingar for eigen kostnad. På 1990-talet engasjerte han seg i den såkalla Rødseth-saka, der han hevda at Therese Rødseth leid av ein sjeldan sjukdom og ikkje hadde vorte mishandla av far sin.

Kjelder

• Denne artikkelen bygger på «Per Stavem» frå Wikipedia på bokmål, den 17. juli 2014.

Bakgrunnsstoff

• «Per Stavem» (på engelsk). Olympedia. Henta 4. mars 2023.