Pietro Mennea

Pietro Paolo Mennea (28. juni 1952–21. mars 2013) var ein italiensk friidrettsutøvar og politikar frå Barletta i Puglia. Han vann EM-gull på 200 meter i 1974 og på både 100 m og 200 m i 1978. I 1980 vart han olympiameister på 200 m i Moskva. Til saman vann han 11 medaljar i ulike EM, OL og VM i tida 1971-83. Han sette verdsrekord på 200 meter med 19,72 sekundar i 1979, ein rekord som stod seg i 17 år.

Pietro Mennea
Pietro Mennea vinn eit løp i Viareggio i 1972
Statsborgarskap	Italia
Fødd	28. juni 1952 Barletta
Død	21. mars 2013 (60 år) Roma
Yrke	advokat, politikar, sprintar, friidrettsutøvar
Språk	italiensk
Høgd	180 centimeter
Politisk parti	I Democratici, Democrazia è Libertà – La Margherita
Nettstad	https://www.pietromennea.it/
Pietro Mennea på Commons

Friidrett

Gjennom 1971-sesongen byrja Mennea å nærme seg europatoppen i sprint, med personleg rekordar på 10,2 sekundar på 100 meter og 20,7 på 200 m. Han fekk sin internasjonale meisterskapsdebut under EM 1971 i Helsinki, der han vart nummer seks på 200 m og var med på Italia sitt bronselag på 4 x 100 meter stafett. I OL-sesongen 1972 slo han seg inn i verdseliten, forbetra sine bestetider til 10,0 og 20,2. Og under Sommar-OL 1972 i München tok han bronsemedaljen på 200 meter.

To år seinare vann han gullmedaljen på 200 meter under friidretts-EM i Roma. I tillegg tok han sølv på både 100 meter og på kortstafetten. Etter å ha vore skadd delar av 1976-sesongen, bestemte han seg for å stå over i OL i Montreal. Etter innstendige oppfordringar valde han å delta, og kom på fjerdeplass på 200 meter og på 4 x 100 m stafett.

Under EM i friidrett 1978 i Praha vann Mennea både 100 og 200 meter. På 200 meter var han heilt suveren med tida 20,16 sekundar, andremann, Olaf Prenzler frå DDR, vart klokka inn på 20,61.

Tidleg i september 1979 sette Mennea italiensk rekord på 100 meter i tynnlufta i Mexico-byen, tida 10,01 sekundar er landsrekord også i 2015. Den 12. september 1979 deltok Mennea på 200 meter i universiaden, som då gjekk av stabelen i Mexico-byen. Vinnartida 19,72 sekundar var ny verdsrekord, ein rekord som vart ståande i heile 17 år, inntil Michael Johnson forbetra han under OL 1996 i Atlanta. Mennea slo andremann i unversiaden med over eit halvt sekund og tredjmann med sju tidels sekund.

Under OL 1980 i Moskva vart Mennea olympisk meister på 200 meter. Etter ein strålande finish slo han skotten Allan Wells i finalen med fattige to hundredels sekund; 20,19 mot 20,21.

Menna gjorde comeback og tok bronse på 200 m under VM 1983 i Helsinki. Under OL 1984 i Los Angeles vart Mennea den fyrste utøvaren som deltok i fire OL-finalar på rad på 200 meter, der han kom på sjuandeplass. Etter å ha lagt opp enno ein gong, gjorde han nok eit comeback, men under Sommar-OL 1988 i Seoul vart han slått på 200 meter i forsøksløpa.

Medaljar og plasseringar i internasjonale meisterskap

• EM 1971 i Helsinki: Bronsemedalje i 4 x 100 m stafett, nr 6 på 200 m - 20,9
• OL 1972 i München: Bronsemedalje på 200 m – 20,30 m
• EM 1974 i Roma: Gullmedalje på 200 m – 20,60, samt sølvmedaljar på 100 m – 10,34, og 4 x 100 m stafett
• OL 1976 i Montreal: Nr 4 på 200 m – 20,54
• EM 1978 i Praha: Gullmedaljar på 100 m – 10,27, og 200 m – 20,16
• OL 1980 i Moskva: Gullmedalje på 200 m – 20,19, bronsemedalje i 4 x 400 m stafett
• VM 1983 i Helsingfors: Bronsemedalje på 200 m – 20,51, sølvmedalje på 4 x 100 m stafett
• OL 1984 i Los Angeles: Nr 7 på 200 m – 20,55
• OL 1988 i Seoul: Utslått i forsøka på 200 m

Politikk

Frå 1999 til 2004 var Pietro Mennea representant i Europaparlamentet, vald for partiet Demokratane (I Democratici).

Kjelder

• Denne artikkelen bygger på «Pietro Mennea» frå Wikipedia på tysk, den 25. april 2015.