Rullebrett

Rullebrett, skeitebrett eller skateboard er eit smalt, avlangt brett med to par små hjul, nytta til å stå på i fart for å kome seg fram eller gjere ulike triks og hopp. Farta får rullebrettkøyraren ved å stå på brettet med eine foten og sparke frå med den andre, eller å køyre utfor bakkar av ulike slag. Det finst òg eigne baner for rullebrettkøyring, og det vert halde konkurransar, mellom anna noregsmeisterskap.

Kjende kommunale innandørshallar for rullebrettkøyring finst i Bergen (Fysak ved Slettebakken haldeplass på Bybanen), i Drammen (Nøstedhallen på vegen mot Svelvik), i Bærum (Arena på Bekkestua) og i Oslo (Oslo Skatehall, Stavangergata 28 på Voldsløkka). Store friluftsanlegg finst på Månejordet i Larvik, på Koigen i Hamar, rett attmed jarnbanestasjonen i Gjøvik og Dyveke bru i Gamlebyen i Oslo. Frå 2016 er det òg ein innandørshall i eit tidlegare hamneskur, Skur 13, på Filipstad i Oslo. Elles finst det mange større og mindre anlegg og innandørsbaner fleire stader ikring i landet.

Eit moderne rullebrett nytta til triksing. Oversida er dekt med eit sandpapirliknande lag, ein gripteip.
Hjula på eit rullebrett er festa til ei aksling på eit elastisk vis, slik at hjula svingar og brettet let seg styre ved at at køyraren legg kroppstyngda over til ein av sidene.
Korleis eit rullebrett styrast.
Rullebrett frå 1970-åra.
I Skur 13 på Filipstad i Oslo er det innandørshall for rullebrettkøyring.

Forbodet i Noreg mot rullebrett

Det var totalforbod mot rullebrett i Noreg frå 7. september 1978 til 9. mai 1989. Forbodet var grunna i dei farane for å verte skada som rullebrettkøyrarar utsette seg for. I desse åra var Noreg det einaste landet i verda som hadde forbod mot å selje, kjøpe eller stå på rullebrett. Men det har synt seg at det ikkje er fleire alvorlege skader ved bruk av rullebrett enn det er i dei fleste andre idrettar.

Bakgrunnsstoff

Norsk Organisasjon for Rullebrett Arkivert 2015-02-09 ved Wayback Machine.