Vera Krepkina

Vera Samojlovna Krepkina (fødd Kalasjnikova, 16. april 1933) er ein russisk tidlegare friidrettsutøvar frå Kotelnitsj i Russland, som tevla internasjonalt i lengdehopp og sprint for Sovjetunionen. Ho vart olympisk meister i lengdehopp i 1960 og vann to EM-gull 4 x 100 meter stafett; 1954 og 1958.

Vera Krepkina
Statsborgarskap	Sovjetunionen, Russland
Fødd	16. april 1933 Kotelnitsj
Død	25. april 2023 (90 år) Kyiv
Yrke	sprintar, friidrettsutøvar, lengdehoppar
Språk	russisk
Høgd	1,59 meter
Politisk parti	Sovjetunionens kommunistiske parti
Vera Krepkina på Commons

Aktiv

Vera Kalasjnikova debuterte internasjonalt under dei olympiske leikane 1952 i Helsingfors. Ho vart slått ut i semifinalane på 100 meter, før ho og lagvenninnene vart nummer fire i 4 x 100 meter stafett med tida 46,3 sekundar.

Ved europameisterskapen i Bern i 1954 tok Krepkina, Rimma Ultikina, Marija Itkina og Irina Turova europameistrar på tida 45,8. Til liks med 1952-olympiaden vart Krekina under sommarleikane 1956 i Melbourne slått ut på 100 m i semfinalane. Sameleis vart Sovjetunionen og Krekpina nummer fire på stafetten på 45,6 sekundar.

Krepkina kom i mål på same tid som britiske Heather Young i finaleløpet på 100 m i EM i friidrett 1958 i Stockholm. Begge vart klokka inn på 11,7 sekundar, Young fekk gullmedaljen, Krepkina sølvet. Avslutningsdagen i Stockholm sprang Krepkina startetappen for Sovjetunionen sitt sigrande lag. Saman med Linda Kepp, Nina Poljakova og Valentina Maslovskaja vann ho sitt andre stafettgull på tida 45,3, ny europarekord.

Også under OL 1960 i Roma rauk Krepkina ut i semifinalane på 100 meter, og ho vart for tredje gong nummer fire i stafettløpet med Sovjetunionen. Mellom desse to øvingane nådde ho høgda i sine år som aktiv. Kort før leikane hadde Hildrun Claus frå Aust-Tyskland med eit hopp på 6,40 m, avløyst olympiameisteren Elżbieta Krzesińska frå Polen som verdsrekordhaldar. Claus stoppa i Roma på 6,21 m og vart nummer tre, bakom Krzesińska på 6,27 m. Krepkina smelte til med 6,37 i fjerde omgang, og sikra seg gullmedaljen.

Krepkina var sovjetmeister på 100 m i 1952, 1957 og 1958. Ho vann sovjetmeisterskapen på 200 m i 1952, men tok aldri nasjonal medalje i lengdehopp.

Kjelder

• Denne artikkelen bygger på «Vera Krepkina» frå Wikipedia på tysk, den 17. oktober 2014.