Arnoldus Koren
Arnoldus von Westen Sylow Koren (22. juli 1764–8. oktober 1854) var ein norsk embetsmann, eidsvollsmann og stortingsmann.
| Arnoldus Koren | |||
.jpg) Arnoldus Koren. På lerretet er det skrive med blekk: «Sorenskriver Arnoldus von Western Sylov Koren, født 22. juli 1764. Malt i hans 86. års alder, (han var da blind) av Anna Nerdrum, nu fru Melby». Måleriet tilhøyrer Eidsvoll 1814. Frå DigitaltMuseum | |||
| Fødd | 22. juli 1764 | ||
|---|---|---|---|
| Død | 8. oktober 1854 (90 år) | ||
| Statsborgar av | Noreg | ||
| Yrke | politikar, jurist | ||
| Barn | Niels Koren | ||
| Alle verv |
| ||
Koren var fødd i Bergen, der far hans var kjøpmann. Sjølv vart han student frå katedralskulen i byen i 1784, og cand. jur. i 1789. Same året byrja han som volontør i det danske rentekammeret i København. År 1795 vart han sorenskrivar i vestre Råbyggelaget, fire år seinare fekk han tilsvarande embete i Hardanger og Voss. I tillegg til dette embetet var han birkedommar på godset Lyse kloster og frå 1818 på godset Rosendal.
I 1814 var Koren utsending frå Søndre Bergenhus på riksforsamlinga på Eidsvoll, han slutta seg til sjølvstendepartiet.[1] 17. mai 1814 var han medlem av deputasjonen som møtte Kristian Fredrik. Han var representant for amtet på det overordentlege storting 1814 og Stortinget 1818. I 1814 var han medlem av Lagtinget og av undersøkingskomiteen. Fire år seinare var han medlem av Lagtinget og av 12 komitear. I fire av komiteane var han formann, som komiteen om skattelova av 1816, om fyr- og merkevesen, om skysslova og om nasjonalfargen og «overdaadighet».
Koren tok avskjed frå embeta sine i 1840, og døydde på prestegarden i Ullensvang i 1854.
Kjelder
endre- ↑ «Arnoldus von Westen Sylow Koren (1764-1854)». Eidsvoll 1814. Henta 2. juli 2015.
- Tallak Lindstøl: Stortinget og Statsraadet 1814-1914. Kristiania, 1914
- Biografisk informasjon om Arnoldus Koren NSD Norsk senter for forskningsdatas politikararkiv
