Berit Kvæven

Berit Kvæven (fødd 19. november 1942) er ein norsk venstrepolitikar, kvinnesaksforkjempar, sivilingeniør og dr.ing. i kjemi.

Berit Kvæven
Fødd	19. november 1942 (82 år) Øvre Sirdal kommune
Statsborgar av	Noreg
Parti	Venstre
Yrke	politikar
Medlem	Norsk Kvinnesaksforening
Alle verv	vararepresentant til Stortinget (1997–2001) Leder for Norsk Kvinnesaksforening (2004–2006)

Kvæven har vore sjefingeniør i Klima- og forureiningsdirektoratet og leiar av SNs overvakingsprogram for sur nedbør. Politisk har ho vore nestleiar i Venstre, partiets fylkesleiar i Oslo, politisk rådgjevar for forbrukar- og administrasjonsminister Eva Kolstad og vararepresentant på Stortinget. Ho har også vore president i Tekna, nestleiar i Akademikernes Fellesorganisasjon og leiar for Norsk Kvinnesaksforening.

Karriere

Kvæven er utdanna sivilingeniør frå Noregs tekniske høgskole i 1967, var forskar ved SINTEF frå 1968 og tok doktorgrad (dr.ing.) i kjemi ved Noregs tekniske høgskole i 1975, med avhandlinga Undersøkelser av kondensasjonsreaksjoner hos aminoforbindelser. Ho har seinare vore sjefingeniør i Klima- og forureiningsdirektoratet, der ho har arbeida med internasjonale oppgåver, bl.a. som leiar av SNs overvakingsprogram for sur nedbør.

Kvæven har også vore medlem av Statens atomtilsyn 1981–1992, medlem av råd for Referanselaboratoriet for vannanalyse 1981–1988, varamedlem av rådet for Havforskingsinstituttet 1982–1989, varamedlem av Forureiningsrådet 1985–1991, styremedlem i Statens tilsynsinstitusjonar i landbruk 1986–1988, styremedlem i Norsk institutt for jord- og skogkartlegging 1990–1993, medlem av det regjeringsoppnemnde Styrereform-utvalet 1990–1991 og varamedlem av styret for Statistisk sentralbyrå frå 1996.

Politikk og organisasjonsverv

Kvæven var leiar for Trondheim Venstre i 1970-åra, personleg sekretær (tilsvarande politisk rådgjevar) for forbrukar- og administrasjonsminister Eva Kolstad i regjeringa til Lars Korvald frå 1972 til 1973, politisk nestleiar i Venstre frå 1976 til 1982, fylkesleiar for Oslo Venstre i 1990, president i Norske sivilingeniørers forening (no Tekna) frå 1990 til 1993, nestleiar i Akademikernes Fellesorganisasjon frå 1991 til 1993 og leiar for Norsk Kvinnesaksforening frå 2004 til 2006. Ho var vararepresentant på Stortinget for Venstre i perioden 1997–2001.

Kjelder

• Denne artikkelen bygger på «Berit Kvæven» frå Wikipedia på bokmål, den 25. mars 2023.

Bakgrunnsstoff

• Berit Kvæven hos Stortinget.