Dag Terje Andersen

Dag Terje Andersen (fødd 27. mai 1957 i Frogn i Akershus fylke) er ein norsk politikar og stortingsrepresentant for Arbeidarpartiet. Han hadde to postar i regjeringa Stoltenberg II, fyrst statsråd i Nærings- og handelsdepartementet frå 29. september 2006 til 20. juni 2008, då han vart statsråd i Arbeids- og inkluderingsdepartementet, noko han var fram til 2. oktober 2009. I tillegg var han ein kort periode i 2006–2007 fungerande statsråd i Fiskeri- og kystdepartementet. Dag Terje Andersen var stortingspresident frå 2009 til oktober 2013, då Olemic Thommessen overtok stillinga.

Dag Terje Andersen
Fødd	27. mai 1957 (67 år) Frogn
Statsborgar av	Noreg
Parti	Arbeidarpartiet
Yrke	politikar, skogsarbeidar
Verv	Stortingspresident i Noreg 2009-2013
Føregangar	Thorbjørn Jagland
Etterfylgjar	Olemic Thommessen
Alle verv	stortingspresident (2009–2013) ordførar i Lardal (1987–1991) ordførar i Lardal (1991–1992) vararepresentant til Stortinget (1985–1989) vararepresentant til Stortinget (1989–1993) stortingsrepresentant (1997–2001) vararepresentant til Stortinget (2001–2005) stortingsrepresentant (2005–2009) stortingsrepresentant (2009–2013) stortingsrepresentant (2013–2017) stortingsrepresentant (2017–2021) politisk rådgjevar (Utanriksdepartementet, 1992–1992) statssekretær (Sosialdepartementet, 1992–1992) Norsk landbruksminister (1996–1997) Norges næringsminister (2006–2008) Norsk arbeidsminister (2008–2009) stortingsrepresentant (fast møtande vararepresentant, 2001–2001) partisekretær (Arbeidarpartiet, 1992–1996)

Dag Terje Andersen er busett i Lardal og vart fyrste gong medlem av kommunestyret der i 1983. Frå 1987 til 1992 var han ordførar i kommunen. Regjeringskarrieren sin byrja han alt i 1992, då han var politisk rådgjevar og statssekretær i høvesvis Utanriksdepartementet og Sosialdepartementet. Andersen var også statsråd i Landbruksdepartementet i regjeringa Jagland frå 1996 til 1997. I perioden mellom 1992 og 1996 var han partisekretær i Arbeidarpartiet, og vart medlem av sentralstyret i partiet i 2002.

Han vart vald inn på Stortinget frå Vestfold i 1997. I perioden som byrja i 2001 var han vararepresentant, før han på nytt vart vald inn i 2005. Det var Silvia K. Kosmo som var vararepresentant for han medan han sat i regjering i denne perioden. Andersen var også vararepresentant i periodane 1985–1989 og 1989–1993. Som stortingsrepresentant har Dag Terje Andersen hatt leiarverv i to ulike stortingskomitear; han leidde Finanskomiteen frå 2000 til 2001 og Kommunal- og forvaltningskomiteen frå 2005 til 2006.

Andersen arbeidde i perioden 1977–1979 som smelteverksarbeidar, og frå 1979 til 1992 og i 2002 som skogsarbeidar. I 2002 studerte han også journalistikk ved Folkeuniversitetet. Etter dette, i perioden 2003–2005 var han innanlandssjef i Norsk Folkehjelp.

Kjelder

• Knut Olav Åmås [red.]: «Andersen, Dag Terje» i Hvem er hvem? (Aschehoug, 2008)
• Biografi på Stortinget.no