Hannu Manninen
Hannu Kalevi Manninen (fødd 17. april 1978) er ein finsk, tidlegare kombinertrennar og langrennsløpar frå Rovaniemi, som vann kombinertpokalen i verdscupen fire år på rad, 2004-2007. Manninen vart verdsmeister i kombinert-sprint i 2007, og vann tre gullmedaljar, to sølvmedaljar og tre bronsemedaljar for Finland i ulike verdsmeisterskap og olympiske leikar i tida 1997-2007. Mellom mars 1996 og mars 2010 vann han 48 renn i verdscupen i kombinert, noko som er rekord for kombinert.
| Hannu Manninen | |
|
| |
| Statsborgarskap | Finland |
| Fødd | 17. april 1978 (46 år) Rovaniemi |
| Idrett | kombinert, langrenn |
| Tok del i | Vinter-OL 2010, Vinter-OL 1994, Nordic combined at the 1998 Winter Olympics – team, Nordic combined at the 2002 Winter Olympics – team, Nordic combined at the 2006 Winter Olympics – team |
Langrennsløparen Pirjo Muranen er systera hans.
Aktiv
endreManninen debuterte internasjonalt under OL 1994 på Lillehammer, før han var fylt 16 år. Han vart juniorverdsmeister i kombinert i 1995 og 1998. Den 23. februar 1996 oppnådde han sin fyrste pallplass i verdscupen, han vart då nummer to etter norske Knut Tore Apeland i eit renn i Trondheim. Fjorten dagar seinare gjekk han til topps i Svenska skidspelen i Falun, hans fyrste verdscuptriumf.
Sigeren i Falun var den fyrste av 48 triumfar i verdscuprenn i kombinert i tida 1996-2010. I tolv av desse femten sesongane noterte han seg for ein eller fleire sigrar i kampen om FIS-pokalen i kombinert. Dei to sesongane han ikkje kunne stige til topps på sigerspallen var 2001 og 2008, i 2009 var han ikkje aktiv i skiidrett. Manninen vart nummer to i verdscupen i kombinert i 1999-sesongen, berre slått av Bjarte Engen Vik frå Noreg. Alle dei fire sesongane frå 2004 til 2007 gjekk han til topps verdscupen. Flest sigrar tok han i 2006-sesongen, då han vann heile tolv renn.
Trass i Manninens dominans gjennom fleire år, sleit han med å lukkast individuelt i dei store meisterskapane. Særleg tydeleg var dette i 2006, då han hadde vunne dei siste sju verdscuprenna føre vinterolympiaden i Torino. Der enda han på niande og tolvte plass i dei individuelle tevlingane. Året etter vann han sin einaste individuelle meisterskapsmedalje, då han under ski-VM i Sapporo sikra seg gullmedaljen i halvprogrammet/sprintøvinga. I den same meisterskapen vann han sitt andre VM-gull for Finland i lagøvinga, saman med Anssi Koivuranta, Janne Ryynänen og Jaakko Tallus. Det fyrste VM-gullet i lagøvinga fekk han i 1999, då saman med Tapio Nurmela, Jari Mantila og Samppa Lajunen. Dessutan vann Manninen OL-gull i 2002 saman med Tallus, Mantila og Lajunen. Gjennom dei elleve sesongane 1997-2007 sikra Manninen seg åtte (3-2-3) medaljar i lagøvinga i VM og OL.
Manninen hadde sin styrke i langrennssporet, og var attpå ein sterk spurtar. Han deltok fleire gongar i sprintøvinga i langrenn, også i verdscupen. Under OL i 2002 vart han nummer åtte i sprint-langrennet.
Manninen la opp i 2011.
Individuelle medaljar og besteplasseringar i meisterskap
endre- VM 1997 i Trondheim: Nr 6
- OL 1998 i Nagano: Nr 11
- VM 1999 i Ramsau: Nr 4 i halvprogrammet
- VM 2001 i Lahti: Nr 4 i normaløvinga og nr 6 i halvprogrammet
- OL 2002 i Salt Lake City: Nr 7 i halvprogrammet i kombinert, nr 8 i langrennssprint
- VM 2003 i Val di Fiemme: Nr 11 i normaløvinga
- VM 2005 i Oberstdorf: Nr 8 i halvprogrammet, nr 9 i normaløvinga
- OL 2006 i Torino: Nr 9 i normaløvinga
- VM 2007 i Sapporo: Gullmedalje i halvprogrammet, nr 6 i normaløvinga
- OL 2010 i Vancouver: Nr 4 i Storbakke/10km
- VM 2011 i Oslo: Nr 16 i Storbakke/10km
Lag-medaljar i meisterskap
endreBakgrunnsstoff
endre- (en) Hannu Manninen – Profil og resultatoversikt i olympiske konkurransar på sports-reference.com.
- (en) Hannu Manninen – Profil og resultatoversikt hos FIS
- (en) Hannu Manninen – Profil og resultatoversikt hos FIS