John Lund
John Theodor Lund (9. oktober 1842–8. januar 1913) var ein forretningsmann, skipsreiar, tollskrivar, fredsaktivist og politikar for Venstre.
| John Theodor Lund | |||
 John Theodor Lund | |||
| Fødd | 9. oktober 1842 Bergen | ||
|---|---|---|---|
| Død | 8. januar 1913 (70 år) | ||
| Statsborgar av | Noreg | ||
| Parti | Venstre | ||
| Yrke | Kjøpmann | ||
| Barn | John Macody Lund | ||
| Verv | Stortingsrepresentant 1883-1885, 1892– 1900 | ||
| Verv | Lagtingspresident 1893–1900 | ||
| Verv | Ordførar i Bergen 1888–1890 | ||
| Verv | Nobelkomiteen 1897–1913 | ||
| Alle verv |
| ||
Lund var fødd i Bergen, far hans var skipper. Han utdanna seg til handelsverksemd, starta i 1867 opp ei agentur- og kommissjonsforretning i heimbyen. Dreiv også å reia ut båtar og skip. Frå 1898 var han tollskrivar i Bergen. Han var frå 1896 styrar av Noregs Bank si avdeling i Bergen.
Lund var medlem av Bergen bystyre i 30 år, åtte av åra sat han i formannskapet. Ordførar var han i tre år, 1888-90. Han var stortingsrepresentant frå Bergen bykrins og for Venstre 1883-85 og 1889-1900. I den fyrste storingsperioden var han medlem av budsjettkomiteen. Perioden 1889-91 var han 1. varamann, men møtte frå 15. mai 1889 og resten av perioden, i staden for Ole Jacob Sparre. Han var då medlem av protokollkomiteen. 1892-1900 var han medlem av valkomiteen og jarnbanekomiteen, siste tre sesjonane var han formann i sistnemnde. Medlem av Lagtinget frå 1892, frå 1893 var han lagtingspresident. Elles medlem av kontraktørkomiteen 1893 og av den parlamentariske valdgiftskomiteen 1897.
Lund var delegat til den fyrste internasjonale fredskongress i London, og til seinare fredskongressar. I 1899 var han president ved det interparlamentariske forbundet si freds- og valdgiftskonferanse i Kristiania. Han var Noregs leiande representant i interparlamentarisk fredsarbeid, vald til fast medlem, seinare æresmedlem, av det interparlamentariske råd. I 1897 vart Lund vald til medlem i den fyrste Nobelkomiteen, eit verv han hadde til han døydde.
Lund var frå 1876 til 1913 medlem, i mange år formann, i 17.mai-komiteen i Bergen. Han var fråverande einast dei åra han sat på Stortinget. Morgonprosesjonen 17.mai i Bergen stoppar alltid opp på John Lunds plass, der det vert utropt eit "Leve!" til John Lunds minne, minnesmerket over han vert kransa og møtelyden syng 1. verset av Bergenssangen (Udsigter fra Ulriken).
Han døydde i Bergen i 1913.
Kjelder endre
- Lindstøl, Tallak:Stortinget og Statsraadet 1814-1914. Kristiania, 1914
Bakgrunnsstoff endre
- nobelprize.org om John Theodor Lund
- Biografisk informasjon om John Lund NSD Norsk senter for forskningsdatas politikararkiv