Kent Johanssen

Kent Johanssen (fødd 30. juni 1970 i Oslo) er ein tidlegare norsk skihoppar. Han vann VM-sølv i 1991 og kom elles to gongar på pallen i verdscupen. Frå NM-tevlingar fekk han med seg tre sølv- og to bronsemedaljar. Johanssen tevla for Bækkelagets Sportsklub.

Kent Johanssen
Statsborgarskap	Noreg
Fødd	30. juni 1970 (54 år) Noreg
Idrett	skihopping

Karriere

Johanssen debuterte i verdscupen den 5. mars 1989 med å bli nr 3 i Holmenkollen, bak den suverene vinnaren Jens Weissflog frå DDR og landsmannen Jon Inge Kjørum. Ei dryg veke etter vart Johanssen verdsmeister for juniorar, på heimebane på Vang i Hedmark. Helga deretter deltok han i verdscupen Planica, der han enda på andreplassen.

Før verdsmeisterskapen i Val di Fiemme i 1991 var det små forventingar til Johanssen. Rett nok tok han sølv i begge NM-tevlingane, bak Espen Bredesen, men ein 20. plass i Oberstdorf var den beste plasseringa i verdscupen. Han overraska stort under rennet i normalbakken, berre slått av austerrikaren Heinz Kuttin. Resten av verdsmeisterskapen og verdcupsesongen hamna han svært langt ned på resultatlistene.

Sesongane 1993-95 var Johanssen ute av landslaget. Han kom med att i 1995, og presterte eit par gode tevlingar. Ein fjerdeplass i Oberhof på forsesongen 1995/96 var hans beste plassering. Seinare same sesongen vekte han stor åtgaum då han ved landinga på 110 meter under NM i Kløvsteinbakken i Meldal miste eine skia. Med eit lite stykke kunst makta Johanssen å halde seg ståande på den gjenverande skia til over fallgrensa, og vart nummer fire.

Han la opp i 1997.

Besteplasseringar i internasjonale meisterskap og renn

• 1989: Nr 2 i Planica og nr 3 Holmenkollen (debut)
• 1990: Nr 8 i Örnsköldsvik
• 1990/91: Sølvmedalje i normalbakken under ski-VM i Val di Fiemme
• 1995: Nr 12 i Holmenkollen
• 1995/96: Nr 4 i Oberhof
• 1996/97: Nr 7 på Lillehammer

Medaljar og besteplasseringar i noregsmeisterskap

• Ski-NM 1988: Nr 10 i storbakken på Rena
• Ski-NM 1989: Bronsemedalje i storbakken på Odnes
• Ski-NM 1990: Sølvmedalje i storbakken i Meldal
• Ski-NM 1991: Sølvmedalje i både normalbakken på Rognan og i storbakken i Bærum
• Ski-NM 1994: Bronsemedalje i normalbakken i Vegårshei
• Ski-NM 1995: Nr 4 i normalbakken i Rælingen
• Ski-NM 1996: Nr 4 i storbakken i Meldal
• Ski-NM 1997: Nr 5 i storbakken på Lillehammer

Kjelder

• Sportsboken, aktuelle årgangar

Bakgrunnsstoff

• (en) Kent Johanssen – Profil og resultatoversikt hos FIS