Kattostfamilien

Kattostfamilien (Malvaceae) er ein tofrøblada plantefamilie i kattostordenen. Han omfattar rundt 236 slekter og 3700 artar, dei fleste tropiske. Familien omfattar for det meste urteaktige vekstar og sjeldnare buskar eller tre. Døme på plantar i kattostfamilien er bomull, durian, hibiskus, kattost, poppelrose og stokkrose.

Kattostfamilien
Systematikk
Rike:	Planteriket Plantae
Underrike:	Viridiplantae
Infrarike:	Streptophyta
Overrekkje:	Landplantar Embryophytes
Rekkje:	Karplantar Tracheophytes
Underrekkje:	Frøplantar Spermatophytes
Orden:	Kattostordenen Malvales
Familie:	Kattostfamilien Malvaceae Juss., 1789

Blada til plantane i familien er spreidde, handnerva og meir eller mindre innskorne eller heile. Blomane er regelmessige, oftast store med vakre fargar. Begeret og krona er 5-talige. Pollenberarane er talrike og samanvaksne til ei søyle midt i blomen. Han har 3–8 fruktblad og dannar ei spaltefrukt eller kapselfrukt.

Nyare molekylære studiar har ført til at kattostfamilien også omfattar Bombacaceae. Denne tidlegare plantefamilien er no rekna som underfamilien Bombacoideae i kattostfamilien. Plantane i denne gruppa er kjenneteikna ved at dei er er tre, nokre av dei kjempestore, og dei fleste med svært laus og lett ved. Innsida til fruktveggen hjå nokre av plantane er kledd med hår, og kan brukast til tekstilproduksjon. Nokre av artane blir difor kalla bomulls- eller silkebomullstre. Til underfamilien høyrer mellom anna apebrødtreet og balsatreet.

I Noreg veks det fire slekter frå kattostfamilien. Alle er innførte, og anten prydplantar eller ugras.

Kjelder

• «kattostfamilien» i Store norske leksikon, snl.no.

Bakgrunnsstoff

• (no) kattostfamilien hos Artsdatabanken
• (en) kattostfamilien – oversikt og omtale av artane i WORMS-databasen
• (en) kattostfamilien i Encyclopedia of Life
• (en) kattostfamilien i Global Biodiversity Information Facility
• (sv) kattostfamilien hos Dyntaxa
• (en) kattostfamilien hos Fossilworks
• (en) kattostfamilien hos ITIS
• (en) kattostfamilien hos NCBI
• (en) kattostfamilien hos The International Plant Names Index
• (en) kattostfamilien hos Tropicos
• (en) Kategori:Malvaceae – bilete, video eller lyd på Wikimedia Commons