Masahiko Harada

Masahiko Harada (fødd 9. mai 1968) er ein japansk, tidlegare skihoppar frå Kamikawa på Hokkaido. Han vann to VM-gull, fyrst i Falun 1993 i normalbakken og sist i Trondheim 1997 i storbakken. Under vinter-OL 1998 i Nagano sikra han OL-gull for Japan i laghopping. Mellom 1993 og 1999 vann Harada ni medaljar i ulike ski-VM og vinter-OL; fem av medaljane var individuelle prestasjonar, dei fire andre vann han i lag med hoppkameratar frå Japan. Han deltok i alle vinterolympiadane frå 1992 og 2006.

Masahiko Harada
Statsborgarskap	Japan
Fødd	9. mai 1968 (56 år) Kamikawa
Idrett	skihopping
Tok del i	Vinter-OL 2006, Vinter-OL 1992, Vinter-OL 2002, Asiatiske vinterleker 2003, Skihopping under Vinter-OL 1998 – Stor bakke, Skihopping under Vinter-OL 1994 – Laghopp, Skihopping under Vinter-OL 1998 – Laghopp

Karriere

Harada vart nummer fire i den tysk-austerrikske hoppveka 1992/93, noko som skulle verte hans beste plassering i hoppveka. Under verdsmeisterskapen 1993 i Falun overraska han stort, etter å ha vorte nummer fire i storbakken gjekk han heilt til topps i normalbakken.

Harada vert mellom anna hugsa for kollapsen i avslutninga av laghopptevlinga under OL på Lillehammer i 1994. Det japanske laget leia suverent før det siste hoppet i den store bakken. Harada, ankermannen, hadde hoppa 122 meter i sitt fyrste hopp og trong berre å hoppe om lag 105 meter i siste omgangen for å sikre gullet. Harada feila og landa på 97,5 meter, dermed gjekk OL-gullet til Tyskland.

Fyrst i desember 1995 vann Harada sitt fyrste verdscuprenn. Sidan i same sesongen gjekk han til topps i ytterlegare tre renn, medan dei siste fem verdscupsigrane kom i OL-sesongen 1997/98. I mellomtida vann Harada eit nytt, noko overraskande verdsmeisterskap i skihopping, då han i Trondheim i 1997 vann hopprennet i storbakken under ski-VM i Trondheim. Tidlegare i meisterskapen hadde han teke sølvmedaljen i normalbakken, berre overgått av Janne Ahonen frå Finland, og han hadde vunne sølv i laghoppinga.

I 1998 fekk Harada bronsemedaljen i storbakke-tevlinga under OL, som gjekk i heimlandet hans. Berre landsmannen Kazuyoshi Funaki og Jani Soininen frå Finland hoppa betre. Harada vart dessutan nummer fem i normalbakken. I same meisterskapen fekk Harada atter sjansen til å vinne OL-gull i laghopp. Det fyrste hoppet hans målte berre 79,5 meter og laget fall frå fyrste- til fjerdeplass. I sitt andre hopp klemde han til med bakkerekord; 137 meter. Lagkameraten Kazuyoshi Funaki sikra så gullet med eit hopp på 125 meter, den fyrste olympiske gullmedaljen i hopp for Japan sidan OL i Sapporo 1972. Dei andre på laget var Takanobu Okabe og Hiroya Saitō. Sesongen 1997/98 vart Harada nummer fire i den totale verdscupen, hans beste plassering i verdscupen nokon gong.

Harada kom på bronseplass i hopprennet i normalbakken under ski-VM 1999 i Ramsau. Han var i same verdsmeisterskapen atter ein gong med på eit japansk lag som tok medalje i lagtevlinga, denne gongen eit VM-sølv.

Harada la opp i 2006.

Verdscupsigrar

Nr.	Dato	Stad	Land
1.	8. desember 1995	Villach	Austerrike
2.	18. februar 1996	Iron Mountain	USA
3.	1. mars 1996	Lahti	Finland
4.	3. mars 1996	Lahti	Finland
5.	8. desember 1997	Villach	Austerrike
6.	12. desember 1997	Harrachov	Tsjekkia
7.	21. desember 1998	Engelberg	Sveits
8.	11. januar 1998	Ramsau	Austerrike
9.	13. mars 1998	Trondheim	Noreg

Kjelder

• Denne artikkelen bygger på «Masahiko Harada» frå Wikipedia på tysk, den 23. november 2012.

Bakgrunnsstoff

• (en) Masahiko Harada – Profil og resultatoversikt hos FIS
• Masahiko Harada i olympedia.org