Oda Helen Sletnes
Oda Helen Sletnes (fødd 10. februar 1953 i Trondheim) er ein norsk arkitekt, diplomat og ambassadør. Frå 2019 til 2021 var ho den norske ambassadøren til Frankrike ved den norske ambassaden i Paris.
| Oda Helen Sletnes | |
.jpg) | |
| Statsborgarskap | Noreg |
| Fødd | 10. februar 1953 (71 år) Trondheim |
| Yrke | diplomat |
Bakgrunn
endreSletnes blei fødd den 10. februar 1953 i Trondheim. I 1972 byrja ho å studere ved Noregs tekniske høgskole og avla i 1977 eksamen som arkitekt. Etter avlagd eksamen arbeidde ho frå 1977 til 1981 som arkitekt i byplanavdelinga i Stavanger.[1]
Diplomatisk karriere
endreSletnes byrja å jobbe i utanrikstenesta i 1981 og gjekk Utanriksdepartementets aspirantkurs. Frå 1983 til 1986 var ho stasjonert ved ambassaden i Paris og ivaretok samstundes oppgåver knytta til UNESCO. Etter nokre år ved presse-, informasjons- og kulturavdelinga i Oslo følgde ny postering i Ottawa i perioden 1988–1990. Tilbake igjen i Oslo var Sletnes frå 1991 til 1994 olympiadekoordinator i presse-, informasjons- og kulturavdelinga i Utanriksdepartementet. Ho fekk deretter oppgåver i samband med Noregs forhandlingar om medlemskap i EU, og var frå 1994 til 1997 leiar for Europaavdelinga. Sletnes blei deretter minister og nestleiar ved den norske delegasjonen til EU i Brussel, ein post ho hadde frå 1997 til 2001. Frå 2002 til 2003 var ho engasjert i EØS-spørsmål, og deretter til 2005 leiar for Europaavdelinga med ansvar for spørsmål knytta til Noreg sine tilhøve til EU, EØS, EFTA, Europarådet, nordisk samarbeid og OSSE. Frå 9. januar 2006 var Sletnes norsk ambassadør til EU[1] før ho leia overvakingsorganet til EFTA (ESA) som president frå 2011 til 2015.[2] Sletnes var frå 1. oktober 2015 til januar 2019 den norske ambassadøren til EU og leia EU-delegasjonen i Brussel.[1] Frå januar 2019 var ho den norske ambassadøren til Frankrike.[3]
Utmerkingar
endreI 2007 utnemnde Kong Harald Sletnes til kommandør av Den Kongelege Norske Fortenesteordenen «for embetsfortjeneste».[4] Sletnes blei i 1997 utnemnd til storriddar av Den islandske falkeordenen[5] og i 2004 blei ho utnemnd til storoffiser av Republikken Italias fortenesteorden.[6]
Kjelder
endre- ↑ 1,0 1,1 1,2 CV, Norges delegasjon til EU.
- ↑ Ambassadør Oda Helen Sletnes ny president i ESA
- ↑ https://www.norway.no/fr/france/for-nordmenn/om-ambassaden/#Ambassad%C3%B8rOdaHelenSLETNES
- ↑ Norges statskalender 2008.
- ↑ Falkaordan 1997, Forseti Íslands.
- ↑ Dettaglio decorato Arkivert 13. januar 2017 på Wayback Machine., Presidente della Repubblica.
- Denne artikkelen bygger på «Oda Helen Sletnes» frå Wikipedia på bokmål, den 22. mars 2024.