Osama bin Laden
Osama bin Laden (10. mars 1957–2. mai 2011) var ein saudiarabar rekna som grunnleggjar og sjef for al-Qaida, ein militant islamistisk organisasjon som har vore involvert i terroriståtak mot sivile og militære mål rundt om på kloden.
| Osama bin Laden أسامة بن محمد بن عود بن لادن | |||
 | |||
| Fullt namn | Usāmah bin Muhammad bin `Awad bin Lādin (arabisk: أسامة بن محمد بن عود بن لادن) | ||
|---|---|---|---|
| Fødd | 10. mars 1957 | ||
| Fødestad | Riyadh i Saudi-Arabia | ||
| Død | 2. mai 2011 | ||
| Dødsstad | Abbottabad i Pakistan | ||
| Mor | Hamida al-Attas | ||
| Far | Mohammed bin Awad bin Laden | ||
| Ektefelle | Najwa bin Laden, Khairiah Sabar, Osama bin Ladens femte kone, Siham Sabar | ||
| Barn | Saad bin Laden, Omar bin Laden, Hamza bin Laden, Abdallah bin Laden, Khalid bin Laden, Miriam bin Laden, Sumaiya bin Laden | ||
| Medlem | al-Qaida | ||
Leiar av al-Qaida
endreBin Laden grunnla al-Qaida i 1988-89 for å støtta og trena utanlandske muslimske motstandsstyrkar mot Sovjetunionen under Den afghansk-sovjetiske krigen. Etter at sovjetarane trekte seg ut av Afghanistan i 1989 vende bin Laden tilbake til Saudi-Arabia. Året etter invaderte Irak under Saddam Hussein nabolandet Kuwait, noko som også sette dei saudiarabiske oljefelta i fare. Bin Laden tilbaud sine trente mujahedin til å forsvara landet, men kong Fahd tok heller imot hjelp frå amerikanske og allierte styrkar. Det at desse styrkane fekk koma inn i og vanhelga «landet med dei to moskeane» (Mekka og Medina) gjorde bin Laden rasande. Etter å ha talt imot styresmaktene for å ta imot amerikanske styrkar blei han landsforvist. Oppmoda av Hassan al-Turabi drog bin Laden og al-Qaida i eksil til Sudan, der Omar al-Bashir nyleg hadde teke makta. Dei hjelpte dei sudanesiske styresmaktene gjennom å setja opp ulike verksemder og militære treningsleirar.
I 1993 støtta Saudi-Arabia Oslo-avtalen mellom Israel og palestinarane, noko som førte til skarp kritikk frå Bin Laden. Han heldt fram med skarpe åtak på kong Fahd, og i 1994 blei han fråteken det saudiske statsborgarskapet sitt. Eigedommen hans i heimlandet blei frosen og familien tok offentleg avstand frå han. I 1998 førte terroråtak mot dei amerikanske ambassadane i Kenya og Tanzania til at al-Qaida og bin Laden blei verdskjende.[1]
Styresmaktene i Sambandsstatane (USA) peika ut Osama bin Laden som hovudmannen bak terroråtaka 11. september 2001, då to fly styrta inn i Verdshandelssenteret i New York og om lag 3 000 menneske vart drepne. I oktober 2004 dukka det opp ein videosnutt der Osama bin Laden vedgjekk å stå bak 11. september-åtaka. Han oppgav som hovudgrunn eit ønske om å straffa stormakta som tillét Israel å invadera Libanon i 1982.[2]
Sidan levde han på ulike stader i lite folkesette strok av Pakistan og Afghanistan. Osama bin Laden var rekna som den mest ettersøkte mannen i verda. USA hadde lova å gje ut store pengesummar til den som peika ut kvar han er. I ein fjernsynstale seint om kvelden 1. mai 2011 (USA-amerikansk tid) opplyste president Barack Obama at amerikanske spesialstyrkar hadde tatt livet av Osama bin Laden i eit hus i småbyen Abbottabad nord for Islamabad i Pakistan.[1]
Kjelder
endreReferansar
endre- ↑ 1,0 1,1 Lars Inge Staveland, «Obama bekrefter at bin Laden er drept» Aftenposten, 02.05.11
- ↑ «'God knows it did not cross our minds to attack the towers'», The Guardian, Saturday 30 October 2004
Bakgrunnsstoff
endre- Amanda Nordhagen Walnum. Osama bin Ladens mor snakker ut for første gang: - Han ble hjernevasket (.) Moren forblir i fornektelse, forteller brødrene.
- Obama: Osama bin Laden ble drept på søndag (vg.no)
- Obama bekrefter at bin Laden er drept (ba.no)
- Obama bekrefter at bin Laden er drept (tv2nyhetene.no)