Pål Tyldum

Pål Bjarne Tyldum (fødd 28. mars 1942) er ein norsk tidlegare langrennar frå Høylandet i Nord-Trøndelag.

Pål Tyldum
Statsborgarskap	Noreg
Fødd	28. mars 1942 (82 år) Høylandet kommune
Idrett	langrenn
Tok del i	Vinter-OL 1976, Vinter-OL 1972, Vinter-OL 1968, Ski-VM 1970
Utmerkingar	Fearnleys olympiske ærespris, Holmenkollmedaljen, Olavstatuetten

Fremste prestasjonane

Tyldum var lite påakta som langrennar før enn han i 1968 gjekk ei rekke gode renn. Han vart olympiameister på femmila i Sapporo under 1972, og var med på stafettlaget som tok gull i Grenoble under 1968. I tillegg vann han tre OL-sølv (eit av dei i stafett) og vart noregsmeister sju gonger. Han var særleg dyktig på dei lengre distansane, kjend for si evne til å disponere kreftene. Tyldum var norsk flaggberar i vinter-OL 1976 i Innsbruck. Han representerte i alle år Idrettslaget Hållingen frå Høylandet. For innsatsen sin under vinter-OL i 1972 vann han Fearnleys olympiske ærespris dette året.

Medaljar og besteplasseringar i internasjonale meisterskap og renn

• 1968: Vinnar av 15 km i Lahti. Andreplass både på 15 km og 50 km i Holmenkollrenna. Fjerdeplass på femmila under OL i Grenoble og sjuandeplass på 15 km. Han gjekk andre-etappen på stafettlaget som vann ein overlegen siger.
• 1969: Vinnar av femmila i Holmenkollen, nummer to på 15 km. Tredjeplass på tremila i Svenska skidspelen i Falun.
• 1970: Andreplass på femmila i Holmenkollen, og tredjeplass på femmila i Lahti. Nr fire på tremila, nr 5 på 15 km og nr 11 på femmila under VM i Štrbské pleso.
• 1971: Vinnar av femmila og andreplass på 15 km i Lahti.
• 1972: Gullmedalje på femmila under OL i Sapporo, sølvmedalje på tremila. Vinnar av 50-kilometeren i Holmenkollen. Han gjekk andre etappe for stafettlaget som fekk sølv etter å kjempa hardt med Sovjet.
• 1973: Andreplass på 15 km og tredjeplass på 50 km i Holmenkollen.
• 1974: Andreplass på femmila i Lahti. Nr 21 på tremila under verdsmeisterskapen i Falun.
• 1976: Nr 10 på 15 km i Holmenkollen.

Medaljar og besteplasseringar i noregsmeisterskap

• Ski-NM 1967: Nr 6 på femmila på Skorovatn
• Ski-NM 1968: Gullmedalje på femmila på Hønefoss og sølv på 30 km i Bærum
• Ski-NM 1969: Gullmedalje 15 km og sølvmedalje på femmila i Alvdal
• Ski-NM 1970: Gullmedalje på femmila i Meldal, og sølv på tremila i Trondheim
• Ski-NM 1971: Gullmedalje på 15 km, sølv på femmila og bronse på tremila, alle renna på Fåberg
• Ski-NM 1972: Gullmedalje både på tremila og femmila i Tydal
• Ski-NM 1973: Gullmedalje på 15 km og sølvmedalje på femmila på Lillehammer
• Ski-NM 1974: Nr 5 på tremila i Selbu
• Ski-NM 1975: Nr 9 på femmila i Flatebygd
• Ski-NM 1976: Bronsemedalje på 15 km i Surnadal

Tyldum vart tildelt Holmenkollmedaljen i 1970.

Kjelder

• Sportsboken, aktuelle årgangar