Rainer Bonhof

Rainer Bonhof
Personleg informasjon
Fødselsdato	29. mars 1952 (72 år)
Fødestad	Emmerich am Rhein i Vest-Tyskland
Høgd	180 cm
Posisjon	Midtbanespelar
Klubbinformasjon
Noverande lag	Borussia Mönchengladbach (visepresident)
Seniorkarriere*
Landslag
Trenar for
1998-1999	Borussia Mönchengladbach
2000-2001	Al-Kuwait
Landslagstrenar for
1990-1998	Tyskland (assistenttrenar)
1998	Tyskland U-21
2002-2005	Skottland U-21
	* Seniorklubbkampar og mål berre telt for nasjonal liga

Rainer Bonhof (fødd 29. mars 1952) er ein tysk tidlegare fotballspelar frå Emmerich am Rhein som vart verdsmeister med Vest-Tyskland i 1974 og europameister både i 1972 og 1980. Han vann elles fleire pokalar i europeiske og nasjonale fotballmeisterskap og -turneringar, flest med Borussia Mönchengladbach, men òg med FC Köln og spanske Valencia CF. Bonhof var særleg kjend for sine harde frispark og kontante langskot.

Klubbspel

Bonhof spelte på Borussia Mönchengladbach frå 1970 til -78. Allereie i sin fyrste sesong vart han seriemeister, og seinare var han med å vinne ytterlegare tre seriemeistertitlar, alle tre i rad. Dei fyrste sesongane var han midtstoppar, men vart så flytta opp på midtbana. Frå 1974 var han ein sentral spelar i laget, og bidrog mykje både då Borussia vann 5-1 på bortebane i UEFA-cupfinalen 1975 mot nederlanske Twente Enschede og i bundesliga i åra frå 1974 til 1977. Saman med lagkaptein Berti Vogts, Uli Stielike, Herbert Wimmer, Allan Simonsen og Jupp Heynckes danna han ryggrada i eit fotballag som i 1977 spelte Borussia fram til sin einaste europacupfinale. Finalen mot Liverpool FC enda likevel med 1-3 tap.

Sommaren 1978 vart Bonhof overført til den spanske klubben Valencia CF. Med det spanske laget vart han spansk cupmeister i 1979, etter siger 2-0 over Real Madrid. Han avslutta to år i Spania, og fruktbart samspel med den argentiske midtspissen Mario Kempes, med å vinne cupvinnarcupen. Etter ein mållaus finale mot London-laget Arsenal, var Bonhof ein av dei som plasserte sitt forsøk i straffeskytinga i nettet bak Arsenal-målvakta Pat Jennings.

Bonhof spelte så i tre sesongar, 1980-83, for FC Köln i heimlandet. I sin siste kamp for FC Köln, cupfinalen 1983, vart han cupmeister i Vest-Tyskland for andre gong. I eit historisk oppgjer mot byrival Fortuna Köln skåra Pierre Littbarski kampens einaste mål. Sommaren 1983 gjekk Bonhof til Hertha Berlin, der han etter kort tid vart ankelskadd, og deretter la bort fotballskoa.

Landslagsspel

Bonhof spelte i tida 1982-81 53 landskampar for Vest-Tyskland og skåra ni mål. Han var mellom dei elleve utvalde både i VM-finalen 1974 og EM-finalen 1976, medan ein skade gjorde at han ikkje fekk speletid under Fotball-EM 1980. Særleg framifrå spel viste han under Fotball-EM 1976, der han gjennom presist pasningsspel stod bak fleire vesttyske skåringar på vegen til finalen. Finalekampen enda 2-2, og EM-tittel til Tsjekkoslovakia etter straffetevling.

Merittar

Verdsmeister: 1974 med Vest-Tyskland
Europameister: 1972 og 1980 med Vest-Tyskland
Finalist i europameisterskap: 1976 med Vest-Tyskland
Vinnar av UEFA-cupen: 1975 med Borussia Mönchengladbach
Vinnar av Cupvinnarcupen: 1980 med Valencia
Vinnar av Bundesliga: 1971, 1975, 1976 og 1977 med Borussia Mönchengladbach
Vinnar av den vesttyske cupfinalen: 1973 med Borussia Mönchengladbach
Vinnar av den spanske cupfinalen: 1979 med Valencia
Vinnar av den vesttyske cupfinalen: 1983 med FC Köln
Finalist i Europacupen: 1977 med Borussia Mönchengladbach

Kjelder

Denne artikkelen bygger på «Rainer Bonhof» frå Wikipedia på tysk, den 20. mars 2017.