Det samiske flagget
(Omdirigert frå Samisk flagg)
Det samiske flagget er flagget til den samiske nasjonen og er felles for samar i alle land. Det vart godkjent av den 13. nordiske samekonferansen, 15. august 1986. Flagget er halde i dei tradisjonelle samiske fargane, grønt, gult, raudt og blått. Det har ein sirkel som symboliserer både sola (raud) og månen (blå).
Den samiske kunstnaren Astrid Båhl frå Troms utforma flagget, inspirert av runebomma og diktet «Paiven parneh» («Beaivvi bártnit») av sørsamen Anders Fjellner (1795–1876).
Samiske flaggdagar
endreDei samiske flaggdagane er bestemte av samekonferansane.
- 6. februar: Den samiske nasjonaldagen, til minne om det første samiske landsmøtet, halde i Metodistkirken i Trondheim i 1917.
- 2. mars: Det finske Sametinget blei opna i 1996.
- 25. mars: Marimesse, Maria bodskapsdag, ein tradisjonell samisk merkedag.
- 24. juni: Midtsommar, jonsokdagen.
- 9. august: SN sin internasjonale dag for urfolk.
- 15. august: Dagen då sameflagget blei godkjent. Også fødselsdagen til Isak Saba, diktaren som skreiv den samiske nasjonalsongen «Sámi soga lávlla».
- 18. august: Stiftinga av Samerådet i 1956.
- 26. august: Det svenske Sametinget blei oppretta i 1993.
- 9. oktober: Det norske Sametinget blei opna i 1989.
- 9. november: Det finske Sametinget blei til i 1973.
