Urszula Włodarczyk

Urszula Włodarczyk (fødd 22. desember 1965) er ein polsk tidlegare friidrettsutøvar frå Wałbrzych. Ho var i tida 1991-2000 ein av verdas beste kvinnelege mangekjemparar, deltok ei tid også i tresteghopp.

Urszula Włodarczyk
Statsborgarskap	Polen
Fødd	22. desember 1965 (59 år) Wałbrzych
Idrett	friidrett
Tok del i	Sommar-OL 2000, Sommar-OL 1996, Sommar-OL 1992

Aktiv

Włodarczyk utmerkte seg særleg i femkamp i innandørsmeisterskapane, der ho som best vart europameister i 1998. Elles i hall-femkampar vart ho nummer to i VM 1993 og EM 1996, og nummer tre i EM 1992, EM 1994, VM 1999 og EM 2000.

I sjukamp sikra Włodarczyk seg bronsemedaljen i europameisterskapen 1994, same året sigra ho i sjukampen ved universiaden 1994 i Buffalo. Fire år seinare tok ho steget opp på sølvplass i den neste europameisterskapen, knapt 99 poeng etter Denise Lewis frå Storbritannia og 50 poeng føre Natallja Sazanovitsj frå Kviterussland. I sitt livs beste sjukamp sanka Włodarczyk 6 542 poeng då verdsmeisterskapen 1997 fann stad i Aten, men måtte nøye seg med fjerdeplass, same plasseringa enda ho på både under Sommar-OL 1996 og Sommar-OL 2000.

Under verdsmeisterskapen 1993 i Stuttgart tevla Włodarczyk også i tresteghopp, der ho med 13,80 meter hamna på ein heiderleg åttandeplass.

Medaljar og plasseringar i internasjonale meisterskap

• VM 1991 i Tokyo: Nr 6 – 6 391 poeng
• OL 1992 i Barcelona: Nr 8 – 6 333 poeng
• VM 1993 i Stuttgart: Nr 5 – 6 394 poeng, og nr 8 i tresteghopp – 13,80 m
• EM 1994 i Helsinki: Bronsemedalje – 6 322 poeng
• VM 1995 i Göteborg: Nr 9 – 6 248 poeng
• OL 1996 i Atlanta: Nr 4 – 6 484 poeng
• VM 1997 i Aten: Nr 4 – 6 542 poeng
• EM 1998 i Budapest: Sølvmedalje – 6 460 poeng, bakom Denise Lewis (6 569 p)
• VM 1999 i Sevilla: Nr 7 – 6 287 poeng
• OL 2000 i Sydney: Nr 4 – 6 470 poeng

Kjelder

• Denne artikkelen bygger på «Urszula Włodarczyk» frå Wikipedia på tysk, den 9. juli 2019.