Andreas Galtvik

Andreas Petersson Galtvik (30. april 1848–23. februar 1937) var ein norsk gardbrukar og politikar for Venstre, frå Frosta i Nord-Trøndelag. Han var ordførar og stortingsmann.

Andreas Galtvik
Statsborgarskap	Noreg
Fødd	30. april 1848 Frosta
Død	23. februar 1937 (88 år)
Yrke	politikar, bonde
Språk	norsk
Politisk parti	Venstre
Andreas Galtvik på Commons

I yngre år gjekk Galtvik på Lars M. Bentsen og Hans Konrad Foosnæs sin folkehøgskule i Stjørdal. Han tok i 1882 over farsgarden i Frosta og dreiv han til 1927. Galtvik var direktør i Frosta sparebank frå 1879 til 1934. I 1898 var han med og stifta Frosta dampskipsselskap, der han var styreformann til 1910. Åstadskommissær frå 1884.

Galtvik var medlem i Frosta heradsstyre i samanhengande førti år, frå 1886 til 1925. Han var ordførar 1898-1913, 1917-19 og 1923-25, til saman 22 år. Åra 1896-99 var han formann i Indtrøndelagens og Namdalens folkevæbningssamlag, ei rørsle som var arbeidde for ei aktivistisk linje i unionspørsmålet. Formann i Stjør- og Verdalens fiskeristyre frå 1894.

Galtvik var stortingsmann for Nordre Trondhjems amt 1900-06. I den fyrste perioden 1900-03 var han medlem i landbrukskomiteen, i den andre perioden medlem av justiskomiteen. 1906-09 var han vararepresentant for stjørdalingen Bernhard Øverland, møtte då i 1907 frå 17. juli og i 1908 frå 12. august. 1909-18 representerte Galtvik valkrinsen Stjørdalen, i alle år medlem av tollkomiteen, sekretær 1913-15 og nestformann 1916-18. Siste valperioden på Stortinget, 1919-21, var han atter representant for Nord-Trøndelag, nestformann i finans- og tollkomiteen.

Galtvik vart tildelt 7. juni-medaljen.

Kjelder

• Lindstøl, Tallak: Stortinget og Statsraadet 1814-1914. Kristiania, 1914

Bakgrunnsstoff

• Andreas Galtvik Arkivert 2014-04-14 ved Wayback Machine. hos Norsk samfunnsvitenskapelig datatjeneste