Espen Andersen (1961)
Espen Andersen (fødd 12. juli 1961) er ein norsk tidlegare kombinertløpar og skihoppar frå Oslo. Han vann to VM-sølv i kombinert for Noreg i 3 x 10 km lag i høvesvis 1982 og 1985. Mellom 1982 og 1986 sikra han seg to sølvmedaljar og ein bronsemedalje i noregsmeisterskap. Andersen sin einaste siger i verdscupen kom i Holmenkollen i 1984.
| Espen Andersen (1961) | |
| Statsborgarskap | Noreg |
| Fødd | 12. juli 1961 (63 år) Oslo |
| Idrett | kombinert |
| Tok del i | Vinter-OL 1984 |
Kombinertløparen Geir Andersen er ein yngre bror.
Karriere
endreEspen Andersen utmerka seg fyrste gongen då han i Lahti i 1981 vart nummer sju i kombinertøvinga, og nest beste nordmann. Året etter var han nær ved å verte norsk meister i kombinert, han fylgde Tom Sandberg så å seie til målstreken. Ein annan sterk individuell prestasjon gjorde han då han i Lahti kom på tredjeplass i kombinert, 10,2 sekund bak vinnaren Rauno Miettinen frå Finland. Høgdepunktet for sesongen var likevel ski-VM på heimebane i Oslo, der Andersen gjekk fyrsteetappen på Noregs tremannslag som fekk sølv. Hallstein Bøgseth og Tom Sandberg gjekk dei andre etappane.
I 1983-sesongen spurtslo han Günther Schmieder frå Aust-Tyskland i Falun og vart vinnar av kombinert i Svenska skidspelen. OL-året 1984 vann Andersen kombinert i Holmenkollrenna framom tre landsmenn, nærast kom den ferske olympiameisteren Tom Sandberg. Under VM på ski i Seefeld i 1985 sikra Espen Andersen seg eit nytt VM-sølv i lagtevlinga, den gongen saman med broren Geir og med Hallstein Bøgseth. Espen Andersens beste individuelle plassering i internasjonale meisterskapstevlingar var ein 13. plass under Ski-VM 1987.
Medaljar og besteplasseringar i noregsmeisterskap
endre- Ski-NM 1982: Sølvmedalje i kombinert og nr 9 i normalbakken, begge Raufoss; nr 11 i storbakken på Rena
- Ski-NM 1983: Sølvmedalje i kombinert og nr 5 i normalbakken i Mo i Rana
- Ski-NM 1984: Nr 4 i kombinert i Hof
- Ski-NM 1985: Nr 6 i kombinert
- Ski-NM 1986: Bronsemedalje på Vang på Hedmark
Kjelder
endre- Espen Andersen i FIS
- (en) Espen Andersen (1961) – Profil og resultatoversikt i olympiske konkurransar på sports-reference.com.
- Holmenkollen medaljevinnarar sidan 1892 Arkivert 2006-09-24 ved Wayback Machine.
- Espen Andersen i olympedia.org