Geir Andersen

Geir Andersen (fødd 21. februar 1964) er ein norsk tidlegare kombinertrennar frå Oslo. Han tok VM-sølv i Seefeld 1985 og var med å vinne lagsølvet for Noreg i same meisterskapen. Under VM 1984 vart han verdsmeister i lagtevlinga, saman med Hallstein Bøgseth og Tom Sandberg. I 1985 vann Andersen verdscupen i kombinert. Han vart noregsmeister i øvinga både i 1985 og 1986. Også den eldre broren Espen Andersen var ein framifrå kombinertrennar.

Geir Andersen
Statsborgarskap	Noreg
Fødd	21. februar 1964 (60 år) Oslo
Idrett	kombinert
Tok del i	Vinter-OL 1984

Karriere

Andersen slo gjennom i 1983 då han kom på bronseplass under noregsmeisterskapen, bak Tom Sandberg. Same sesongen fekk han sølv i junior-VM, året etter tok han gullet i same meisterskapen.

På nyåret i 1984 fekk han si fyrste pallplassering i verdscupen då han vart andremann i Schonach etter Thomas Müller frå Vest-Tyskland. I februar månad deltok Andersen i kombinertøvinga under vinter-OL i Sarajevo og vart nummer ti. Etter tre strake tredjeplassar i verdscupen reiste han i mars 1984 til Rovaniemi i Finland, der han saman med Hallstein Bøgseth og Tom Sandberg vann verdsmeisterskapen i nordisk kombinert for lag.

Andersens fyrste verdscupsiger kom i Planica midt i desember 1984, seinare i sesongen oppnådde han tre sigrar til. I verdsmeisterskapen på ski i Seeefeld fekk han sølvmedalje både i den individuelle tevlinga og i lagtevlinga. Attpå dei fire fyrsteplassane oppnådde han også tre andreplassar i verdscupen, noko som førte til han vann verdscupen i kombinert for 1985 med stor margin.

Straks før jul i 1985 vann han i Tarvisio sin siste siger i verdscupen. Etter dette sleit Andersen med å kome aller øvst på resultatlistene i kombinertrenn. Dermed fekk han ikkje delta for Noreg i korkje ski-VM 1987 eller vinter-OL 1988. Hans siste pallplassering var ein tredjeplass i Saalfelden i desember 1988.

Besteplasseringar i internasjonale meisterskap og renn

• 1984: Nr 3 både i Falun, Lahti og i Holmenkollen. Nr 10 i vinter-OL i Sarajevo
• 1985: VM-sølv i Seefeld, vinnar i Planica, St. Moritz, Kavgolovo og Lillehammer
• 1985/86: Vinnar i Tarvisio og nr 2 i Lahti
• 1987/88: Nr 4 i Bad Goisern
• 1989: Nr 3 i Saalfelden

Medaljar og besteplasseringar i noregsmeisterskap

• Ski-NM 1983: Bronsemedalje i Mo i Rana
• Ski-NM 1984: Sølvmedalje i Hof
• Ski-NM 1985: Gullmedalje i Tromsø
• Ski-NM 1986: Gullmedalje på Vang
• Ski-NM 1988: Nr 7 på Vang
• Ski-NM 1989: Nr 4 på Geilo

Geir Andersen la opp i 1989.

Kjelder

• Sportsboken, aktuelle årgangar

Bakgrunnsstoff

• Geir Andersen i fis-ski.com
• Geir Andersen i olympedia.org