Franz Heinzer

Franz Heinzer (fødd 11. april 1962) er ein sveitsisk tidlegare skirennar frå Schwyz som deltok i verdscupen i alpint i tida 1981-94. Han vart verdsmeister i utfor i 1991, same sesongen vann han utforcupen og super-G-cupen av verdscupen i alpint. Utforcupen vann han også i 1992 og 1993. Totalt gjekk han til topps i 17 verdscuprenn, 15 i utfor og to i den alpine kombinasjonen. Han vann fire sveitsiske meisterskap i utfor, og eitt i super-G.

Franz Heinzer
Statsborgarskap	Sveits
Fødd	11. april 1962 (62 år) Schwyz
Idrett	alpint
Tok del i	Vinter-OL 1994, Vinter-OL 1992, Vinter-OL 1988

Aktiv

Heinzer debuterte i verdscupen i alpint i januar 1981, og vart nummer åtte i utforrennet i Kitzbühel i Austerrike. Knappe to månader seinare kleiv han opp på pallen, då han vart nummer tre i utfor i Aspen i USA. Under VM 1982 i Schladming deltok han i utfor og kom på fjerdeplass.

Straks før jul i 1982 tok Heinzer sin fyrste verdscupsiger, i Val-d'Isère vann han den alpine kombinasjonen framom landsmennene Peter Müller og Peter Lüscher. Nokså nøyaktig eitt år seinare var Heinzer tilbake i Val d'Isere, og på ei helg vann han både utforrennet og den alpine kombinasjonen. I utfor var han ein hundredel framom Todd Brooker frå USA og fem hundredelar framom Harti Weirather frå Austerrike, medan han sigra klart over landsmannen Pirmin Zurbriggen i kombinasjonen.

Heinzer fekk nye fjerdeplassar i VM-utfor både i 1985 og 1987. Både i 1987-sesongen og OL-sesongen 1988 kom han på tredjeplass i utforcupen av verdscupen i alpint. Under OL 1988 mislukkast han og noterte ein 15. plass som best. Sesongane 1989 og 1990 heldt han eit lågare nivå.

Frå 1991 var Heinzer sterkt tilbake, og var verdas beste utforrennar i tre år på rad, i 1991 vann han jamvel super-G-cupen av den alpine verdscupen. Hans største meisterskapstriumf kom under VM 1991 i Saalbach-Hinterglemm, då han vann utforrennet.

Under vinter-OL 1994 på Lillehammer deltok Heinzer i utfor. Han hekta skia i startporten og var ute av rennet. Ein månad seinare la han opp.

Medaljar og besteplasseringar i internasjonale meisterskap

• 1982: Nr 4 i utfor under VM i alpint i Schladming
• 1985: Nr 4 i utfor under VM i alpint i Bormio
• 1987: Nr 4 i utfor under VM i alpint i Crans-Montana
• 1988: Nr 15 i super-G under vinter-OL i Calgary
• 1989: Nr 11 i super-G under VM i alpint i Vail
• 1991: Gullmedalje i utfor under VM i alpint i Saalbach-Hinterglemm
• 1992: Nr 6 i utfor under vinter-OL i Albertville
• 1993: Nr 10 i utfor under VM i alpint i Morioka

Verdscupsigrar

Dato	Stad	Land	Øving
19. desember 1982	Gherdëina	Italia	Kombinasjon
9. desember 1983	Val-d'Isère	Frankrike	Utfor
10. desember 1983	Val-d'Isère	Frankrike	Kombinasjon
22. februar 1986	Åre	Sverige	Utfor
4. januar 1987	Laax	Sveits	Utfor
11. mars 1988	Beaver Creek	USA	Utfor
14. desember 1990	Gherdëina	Italia	Utfor
12. januar 1991	Kitzbühel	Austerrike	Utfor
8. mars 1991	Aspen	USA	Utfor
16. mars 1991	Lake Louise	Canada	Utfor
14. desember 1991	Gherdëina	Italia	Utfor
17. januar 1992	Kitzbühel	Austerrike	Utfor
18. januar 1992	Kitzbühel	Austerrike	Utfor
25. januar 1992	Wengen	Schweiz	Utfor
10. januar 1993	Garmisch-Partenkirchen	Tyskland	Utfor
16. januar 1993	St. Anton	Austerrike	Utfor
23. januar 1993	Veysonnaz	Sveits	Utfor

Kjelder

• Denne artikkelen bygger på «Franz Heinzer» frå Wikipedia på tysk, den 27. oktober 2012.

Bakgrunnsstoff

• (en) Franz Heinzer – Profil og resultatoversikt hos FIS