Henning Berg

Henning Berg (fødd 1. september 1969) er ein tidlegare norsk fotballspelar fødd på Eidsvoll. Berg spelte høgreback eller midtstoppar, og var i mange år fast på det norske landslaget. Berg fekk til saman 100 A-landskampar, og er med det spelaren med nest flest landskampar for Noreg gjennom tidene. Berre Thorbjørn Svenssen har fleire A-landskampar (104).

Henning Berg

Personleg informasjon
Fullt namn	Henning Stille Berg
Fødd	1. september 1969
Fødestad	Eidsvoll
Posisjon	Forsvar, midtstoppar & høgreback
Ungdomsklubbar
1987	Lørenskog
Seniorkarriere*
År	Lag	Kampar (Mål)
1988–1991 1992 1992–1996 1996–2000 2000–2003 2003–2004 1988–2004	Vålerenga Lillestrøm Blackburn Rovers Man United Blackburn Rovers Rangers Totalt	066 0(2) 020 0(1) 159 0(4) 066 0(2) 091 0(3) 020 0(0) 422 (12)
Landslag
1992–2004	Noreg	100 0(9)
Trenar for
2005–2008 2008-2011 2012 2014-2015	FC Lyn Oslo Lillestrøm SK Blackburn Rovers FC Legia Warszawa
* Seniorklubbkampar og mål berre telt for nasjonal liga og oppdatert 8. februar 2007 ‡ Landslagsmål oppdatert 8. februar 2007

Spelarkarriere

Berg byrja sin seniorkarriere i KFUM Oslo, og gjekk til Vålerenga i 1988. Han spelte fire sesongar for VIF, men gjekk til erkerivalen Lillestrøm i 1992. Det var som Lillestrøm-spelar at han debuterte på landslaget, i ein privatlandskamp mot Færøyane 13. mai 1992 (Resultat:2–1). Etter glimrande spel i VM-kvalifiseringskampen mot England seinare same året vart han kjøpt av Premier League-klubben Blackburn.

I 1994 spelte han alle kampane for Noreg i fotball-VM i USA. Våren 1995 vann Blackburn serien, og Berg vart med det den første nordmannen som vart seriemeister i engelsk fotball. Berg si spelardrakt og medalje er i dag utstilt på fotballmuseet på Ullevaal stadion. I 1997 vart han selt til Manchester United, der han vart lagkamerat med Ole Gunnar Solskjær og Ronny Johnsen. Berg spelte tre sesongar for United, og var med på å vinne to ligameisterskap. Han var òg med på å vinne Champions League i 1999, sjølv om han ikkje fekk spele i finalen. Han deltok òg i fotball-VM i 1998, der han var norsk kaptein.

I 2000 gjekk Berg tilbake til Blackburn, der han spelte tre sesongar til, før han avslutta karrieren med éin sesong i skotske Rangers. Han spelte sin 100. og siste landskamp i privatlandskampen mot Wales i mai 2004, der han spelte 20 minutt før han forlét banen til ståande applaus. Han la opp som spelar sommaren 2004.

Merittar

• Vinnar av Meisterligaen: 1999 med Manchester United
• Engelsk ligameister: 1995 med Blackburn, 1999 og 2000 med Manchester United
• Vinnar av FA-cupen: 1999 med Manchester United
• Vinnar av den engelske ligacupen: 2002 med Blackburn

Trenarkarriere

Lyn

Henning Berg skreiv under ein fireårskontrakt for Lyn den 22. april 2005. Berg fekk sin debut som Lyntrenar mot Start på Ullevål 24. april 2005, og kampen enda 1-1. Henning Berg styrte Lyn til ein tredjeplass den sesongen.

Etter ein god start på Tippeligaen, vart det den 19. august 2008 klårt at Henning Berg skulle overta som hovudtrenar for Lillestrøm Sportsklubb frå og med 1. januar 2009.. Etter mykje uro i Lyn, vart det 9. september 2008 klårt at Henning Berg ville gå av som Lyntrenar med umiddelbar verknad. Berg sin siste kamp som trenar for Lyn var mot Tromsø 31. august 2008, der sluttresultatet vart 3-3. Henning Berg fekk 122 kampar som Lyntrenar.

Lillestrøm

Sjølv om planen var at Berg skulle ta over Lillestrøm etter nyåret, tok han over som hovudtrenar alt 21. oktober 2008, dagen etter at Lillestrøm hadde tapt 3-1 mot erkerivalen Vålerenga. Då Henning Berg starta jobben, låg Lillestrøm 3 poeng over sikker plass, med to serierundar att. I den første kampen sin som Lillestrømtrenar vann Henning Berg 4-2 mot Rosenborg på Åråsen, og sikra med det tippeligaspel i 2009.

27. oktober 2011 blei Berg løyst frå stillinga som trener for klubben etter ein periode med svake resultat og indre uro i klubben.

Trenarstatistikk

Lag	Nasjon	Frå	Til	Statistikk
				K	V	T	U	Seiar %
Lyn	NOR	22 April 2005	9 September 2008	120	55	23	42	45.83
Lillestrøm	NOR	21 oktober 2008	27 oktober 2011	89	28	33	28	31.46

Kjelder

• Omsett frå Wikipedia på bokmål, innhenta måndag 4. januar 2010, klokka 19:55.
• eu-football

Fotnotar