Ipswich Town
Ipswich Town Football Club er ein engelsk profesjonell fotballklubb frå Ipswich i Suffolk. Klubben skal i 2009/10-sesongen spela i Football League Championship, det 2. nivået i engelsk fotball, der dei har spelt sidan dei rykte ned frå Premier League i 2002. Klubben blei stifta i 1878 og blei vald inn i The Football League i 1938. Kallenamnet til klubben er "The Tractor Boys" - (Traktorgutane), og dei spelar heimekampane sine på Portman Road i Ipswich, som ligg om lag 13 mil nordaust for London. Eit av dei klassiske lokaloppgjera i engelsk fotball er kampane mellom Ipswich Town og klubben frå nabobyen, Norwich City.
| Ipswich Town | |||
| |||
| Fullt namn | Ipswich Town Football Club | ||
|---|---|---|---|
| Kallenamn | The Tractor Boys (Traktorgutane) | ||
| Grunnlagd | 1878 | ||
| Heimebane | Portman Road, Ipswich (Kapasitet: 30 311) | ||
| Styreleiar | David Sheepshanks | ||
| Hovudtrenar | Roy Keane | ||
| Liga | Football League Championship | ||
| 2010/11 | 13. plass | ||
| Nettstad | itfc.co.uk | ||
| |||
Historie
endreTidleg historie
endreKlubben vart stifta som amatørklubb i 1878, under namnet Ipswich AFC. I 1888 slo dei seg saman med Ipswich Rugby Club og skifta namn til Ipswich Town. I 1936 vart klubben profesjonell og spelte i to sesongar i Southern League. I 1938 vart Ipswich vald inn i Fotballigaen, i 3. divisjon sør. Dei nådde 2. divisjon for første gong i 1954, og rykte for første gong opp i 1. divisjon i 1961. I den første sesongen i 1. divisjon, 1961/62, vart dei sensasjonelt seriemeistrar. Managageren frå 1955 til 1963, Alf Ramsey, slutta for å bli landslagstrenar for England. Etter to sesongar til i 1. divisjon rykte Ipswich ned att i 1964, men kom tilbake til 1. divisjon i 1968. Denne gongen klarde klubben å stabilisera seg på eit høgt nivå, og vart verande i 1. divisjon til 1986.
Glansdagane
endreGlansdagane til klubben kom i Bobby Robson si tid som manager, frå 1969 til 1982. Dei vart FA-cupmeistrar i 1978 og kom på 2. plass i serien i 1980/81 og 1981/82. Frå 1973/74-sesongen til 1982/83-sesongen kvalifiserte klubben seg til Europacup-spel kvar sesong utanom éin. Dei vann UEFA-cupen i 1981. Andre merkbare resultat frå Europacup-spel kom i 1973/74-sesongen då dei slo ut både Real Madrid og Lazio frå UEFA-cupen, og i 1979/80-sesongen då dei slo ut Skeid frå Oslo i 1. runde av UEFA-cupen. Etter at Robson forlet klubben for å ta over som landslagstrenar for England, vart klubben sine resultat raskt dårlegare, og i 1986 rykte dei ned i 2. divisjon.
Nyare tid
endreIpswich Town rykte opp att til øvste nivå i 1992, i tide til å vera med i dei tre første sesongane av den nye Premier League, utan imponerande resultat, før dei rykte ned att på 2. nivå i 1995. Manageren George Burley fekk halda fram i jobben trass i nedrykket, og leia laget tilbake i Premier League i 2000, for siste gong så langt. Klubben klarde ein imponerande 5. plass i 2000/01-sesongen, men allereie neste sesong rykte dei ned att, og har spelt på 2. nivå (Division One/Football League Championship) sidan då. Den same sesongen som dei rykte ned frå Premier League kvalifiserte dei seg til Europacup-spel gjennom ein "Fair play"-plass, og spelte dermed i UEFA-cupen samstundes som dei spelte i nest høgaste divisjon heime, i 2002/03-sesongen. Manageren Burley vart erstatta av Joe Royle hausten 2002. Ipswich spelte playoff for opprykk til Premier League både i 2004 og 2005, men utan hell. Sommaren 2006 vart Royle erstatta som manager av spelaren Jim Magilton, som etter tre sesongar utan å ha fått klubben tilbake i Premier League mista jobben i april 2009. Den nye manageren vart Roy Keane.
Merittar
endre| TROFE | TAL | ÅR |
|---|---|---|
| Ligameister | 1 | 1961/62 |
| FA-Cupen | 1 | 1978 |
| UEFA-cupen | 1 | 1981 |
| Texaco Cup | 1 | 1973 |
| FA Youth-cup | 3 | 1973, 1975 og 2005 |
- Nr. 2 i 1. divisjon: 1980/81 og 1981/82.
- Vinnar av 2. divisjon: 1960/61, 1967/68 og 1991/92.
- Vinnar av playoff-finale i 1. divisjon (gamle 2. divisjon): 1999/00.
- Vinnar av 3. divisjon (sør): 1953/54 og 1956/57.
- Beste resultat i FA Premier League: Nr. 5 i 2000/01.
- Beste resultat i Ligacupen: Semifinale i 1982 og 1985.
- Deltaking i serievinnarcupen (forløpar til Meisterligaen): 1962/63.
- Deltaking i UEFA-cupen: 1973/74, 1974/75, 1975/76, 1977/78, 1979/80, 1981/82, 1982/83, 2001/02 og 2002/03.
Spelarstall 2010/11-sesongen
endreEngelske landslagsspelarar
endreSidan 1878 har Ipswich hatt 12 engelske landslagsspelarar. Dei har spelt 156 kampar, og skåra 22 mål for England i desse kampane. I 145 av kampane har spelaren frå Ipswich vore med frå start, og åtte gonger har det engelske landslaget hatt ein kaptein som representerte Ipswich på klubbnivå.
| Nr. | Landslagsspelar | Namn | Kampar | Frå start | Innbytar | Kaptein | Mål | Tidsrom |
|---|---|---|---|---|---|---|---|---|
| 1 | Nr. 801 | Raymond Crawford | 2 | 2 | 0 | 0 | 1 | 22/11·1961 - 04/04·1962 |
| 2 | Nr. 882 | Mick Mills | 42 | 40 | 2 | 8 | 0 | 11/10·1972 - 05/07·1982 |
| 3 | Nr. 905 | Kevin Beattie | 9 | 7 | 2 | 0 | 1 | 16/04·1975 - 12/10·1977 |
| 4 | Nr. 907 | Colin Viljoen | 2 | 2 | 0 | 0 | 0 | 17/05·1975 - 21/05·1975 |
| 5 | Nr. 908 | David Edward Johnson | 3 | 3 | 0 | 0 | 3 | 21/05·1975 - 03/09·1975 |
| 6 | Nr. 928 | Paul Mariner | 33 | 28 | 5 | 0 | 14 | 30/03·1977 - 16/11·1983 |
| 7 | Nr. 929 | Brian Talbot | 5 | 4 | 1 | 0 | 0 | 28/05·1977 - 15/06·1977 |
| 8 | Nr. 931 | Trevor Wymark | 1 | 0 | 1 | 0 | 0 | 12/10·1977 - 12/10·1977 |
| 9 | Nr. 944 | Russell Osman | 11 | 11 | 0 | 0 | 0 | 31/05·1980 - 21/09·1983 |
| 10 | Nr. 945 | Terry Butcher | 45 | 45 | 0 | 0 | 3 | 31/05·1980 - 22/06·1986 |
| 11 | Nr. 949 | Eric Gates | 2 | 2 | 0 | 0 | 0 | 10/09·1980 - 15/10·1980 |
| 12 | Nr. 1101 | Richard Wright | 1 | 1 | 0 | 0 | 0 | 03/06·2000 - 03/06·2000 |
Managerar
endre| Manager | Periode | Kampar | Vunne | Uavgjort | Tapt | |
|---|---|---|---|---|---|---|
 England
|
Mick O'Brien | 01/08·1936 - 01/11·1937 | 2 | 1 | 0 | 1 |
 Skottland
|
Scott Duncan | 01/11·1937 - 01/08·1955 | 477 | 191 | 107 | 179 |
| England
|
Alf Ramsey | 01/08·1955 - 01/04·1963 | 363 | 172 | 74 | 117 |
| England
|
Jackie Milburn | 01/04·1963 - 30/09·1964 | 67 | 16 | 15 | 36 |
| England
|
Bill McGarry | 01/10·1964 - 01/11·1968 | 181 | 76 | 58 | 47 |
| England
|
Bobby Robson | 01/01·1969 - 07/07·1982 | 617 | 267 | 153 | 197 |
| England
|
Bobby Ferguson | 08/07·1982 - 20/05·1987 | 240 | 86 | 61 | 93 |
| Skottland
|
John Duncan | 16/06·1987 - 08/05·1990 | 150 | 65 | 29 | 56 |
| England
|
John Lyall | 10/05·1990 - 05/12·1994 | 124 | 47 | 45 | 32 |
| Skottland
|
George Burley | 28/12·1994 - 11/10·2002 | 409 | 185 | 97 | 127 |
| England
|
Joe Royle | 28/10·2002 - 11/05·2006 | 189 | 81 | 48 | 60 |
 Nord-Irland
|
Jim Magilton | 05/06·2006 - 22/04·2009 | 143 | 55 | 39 | 49 |
 Irland
|
Roy Keane | 23/04·2009 - |
Kjelder
endre- Rollin, Jack (1998): ROTHMANS BOOK OF FOOTBALL RECORDS.
Headline Book Publishing, London. ISBN 0-7472-1954-0 - Rollin, Glenda & Rollin, Jack (2006): SKYSPORTS FOOTBALL YEARBOOK 2006-07.
Headline Book Publishing, London. ISBN 0-7553-1526-X
Bakgrunnsstoff
endre- (en) Klubben si offisielle heimeside
- Norwegian blues - Ipswich sin norske supporterklubb
- (en) Klubbside frå BBC
- (en) Oversikt over klubben sine resultat i liga og cup
- (en) Nettstad om Ipswich Town (Pride of Anglia)
- (en) Nettstad om Ipswich Town (TractorBoys) Arkivert 2006-08-16 ved Wayback Machine.
- (en) Uavhengig nettstad om Ipswich Town (BluesWeb)
- (en) Uavhengig nyheitsnettstad om Ipswich Town (TWTD) Arkivert 2006-10-21 ved Wayback Machine.
- (en) Oversikt over engelske landslagsspelarar (England Football Online)
- (en) Klubbside frå Soccerbase