Skinntrøya

«Skinntrøya» er ein springar som er mykje nytta til dans i Hallingdal og Valdres, der slåtten er kalla «Skraddarlåtten», «Krotakyr» eller «Dølehusen». Nemninga Krotakyr er frå Vang i Valdres, Dølehusen frå Bendik i Nøen. Springaren høyrer til det sentrale repertoaret i hallingdal og Valdres. Slåtten fekk namnet «Skinntrøya» etter at ei budeie dansa til slåtten utan å ta skinnkleda av (dei ho nytta i fjøset). Spelemannen den gongen var Myreguten (Ola J. Myro). Myreguten og Ola Dekko er dei sentrale kjeldene til slåtten i Hallingdal. I Valdres finst det dokumentasjon på han både i Vang og i Aurdal, noko som tyder på at springaren har vore nytta der alt på Jørn Hilme si tid eller før. Slåtten kom og til Krødsherad med Andres Vinna.

Variantgruppa

Slåtten har katalognummer 504 i hardingfeleverket. Variantgruppa tel tre slåttar frå Hallingdal, tre frå Valdres og ein frå Lærdal. Formene er svært like einannan, noko som tyder på at dei alle kjem frå same kjelda. Skilnaden er at formene frå Valdres byrjar på kvinten, medan dei andre byrjar på midtstrengene. Det er rimeleg å tenkje seg at dette er ein gamal sogneslått som har funne vegen over fjellet til Hallingdal. Varianten frå Sogn har tre vek der hallingvarianten har fire. Dette fjerde veket er eit vandretak som er sams meslåtten «Raske-Jørand», ein variant av springaren Jarand Skinnarland. Det er berre i Hallingdal dette taket er utvikla (som brigde mellom det opphavlege første og andre veket).

• a: Skinntrøya, etter Sevat Sataøen frå Ål. Nedskrift Eivind Groven 1963 etter opptak i NRK (G 1401, NRK magn. 1874). Sataøen hadde venteleg slåtten frå Myreguten.

• b: Skinntrøya, etter Kristian Øvrevollseie, Hol. Nedskrift Sven Nyhus 1975. Øvrevollseie hadde slåtten etter Sevat Sataøen.

• c: Skinntrøya, etter Odd Bakkerud, Nes. Nedskrift Truls Ørpen 1949. Bakkerud hadde slåtten etter Kristen Eidal frå Nes.

• d: Springar, etter Per Sandnes, Lærdal. Nedskrift Arne Bjørndal (Bjørndal gamle slåttar hefte IV). Sandnes hadde slåtten etter Ola Sandnes, som hadde han frå Jens Fresvik frå Leikanger i Sogn.

• e: Skraddarlåtten, etter John N. Dale, Øystre Slidre. Nedskrift Eivind Groven 1922 (G 498). Slåtten er kalla Krotakyr i Vang.

• f: Gamle Sara, etter spelemannen Andreas Hauge, Nord-Aurdal. Nedskrift Arne Bjørndal 1947 (B 2219). Bendik i Nøen kalla slåtten Dølehusen.

• g: Skraddarlåtten, etter Torleiv Bolstad, Øystre Slidre. Nedskrift Sven Nyhus 1975. Bolstad hadde slåtten etter Nils Beitohaugen, Øystre Slidre. Slåtten slenger innpå ei form etter Andres Vinna frå Krødsherad (Ø 32).

.