Stripeflugeskvett
Stripeflugeskvett (Petroica australis) er ein liten sporvefugl i flugeskvettfamilien, Petroicidae. Han er endemisk for New Zealand, lever i habitat med skog over delar av begge hovudøyane og over Stewart Island/Rakiura i sør. Òg på omkringliggande øyar i nord som Little Barrier Island og Kapitiøya. Det er tre underarter som viser variasjon i fjørdrakt. Der er òg skilnader i fjørdrakt mellom kjønna.
| Stripeflugeskvett | |
 Stripeflugeskvett på Nordøya på New ZealandNordøya Foto: Craig Nash
| |
| Utbreiing og status | |
Status i verda:  Livskraftig Utbreiinga av Stripeflugeskvett | |
| Systematikk | |
| Rike: | Dyr Animalia |
| Rekkje: | Ryggstrengdyr Chordata |
| Underrekkje: | Virveldyr Vertebrata |
| Klasse: | Fuglar Aves |
| Orden: | Sporvefuglar Passeriformes |
| Familie: | Flugeskvettar Petroicidae |
| Slekt: | Petroica |
| Art: | Stripeflugeskvett P. australis |
| Vitskapleg namn | |
| Petroica australis | |
Skildring
endrePå Nordøya er hannfuglen av stripeflugeskvetten mørk, nær svart, men nedre bryst og buk er gråleg og dei har ein liten kvit flekk rett over nebbrota. Hofuglen på Nordøya er litt bleikare med grålege område på strupe og bryst. Fjørene har bleike fjørskaft som gjev inntrykk av striper i fjørdrakta. Underarten på Stewart Island er mykje lik den på Nordøya. På Sørøya har hannfuglar eit tydeleg skilje mellom den mørke oversida og ei lys gul underside og nedre bryst. Også her har hannar ein liten kvit flekk over nebbrota. Hofuglar på Sørøya har gråare bryst med uklåre lysare område. Ungfuglar i alle underartane liknar hofuglar. Stripeflugeskvettar måler 18 centimeter og veg 35 gram.
Stripeflugeskvettar var tidlegare utbreidde over heile Nordøya og Sørøya. På Nordøya er dei i dag utbreidde i eit belte frå Bay of Plenty i nord til Taranaki i sørvest. Utbreiinga på Sørøya er konsentrert i nordvest, nord for Søralpane og austover til Marlborough. Utanom dette finst dei berre i mindre isolerte område på vestlege delar av Sørøya og rundt Dunedin på austkysten. Det finst ein levedyktige bestand på Stewart Island/Rakiura, men han er mest vanleg på Little Barrier Island, Kapitiøya og på nokre område på nordlege Sørøya.
Stripeflugeskvettar er monogame og para held saman frå år til år. Paret vernar territorium heile året, men hannen er mest aktiv i hekketida med song. Songen er høg og klår med ei avtakande setning 'pvii-pvii-pvii'. Egglegging kan skje i perioden frå juli til januar, og dei kan ha opp til fire kull i sesongen, jamvel seks kull om nokre kull går tapt. Kvart kull er på 2-4 egg. Desse fuglane startar hekking når dei er ca. eit år gamle, og forventa levealder har vore rekna til tre år, men ein kjenner eit individ som blei 16 år.
Føda består hovudsakleg av virvellause dyr, men dei kan òg ete av frukter når dei er tilgjengelege. For det meste tar dei byttet nede på bakken, dei kan sitje på låge greiner og kaste seg ned på bakken når byttet er observert.
Arten har status som verna endemisk utan å vere trua, og bestanden er minkande grunna habitatstap og innførte predatorar.[1]
Underartane i rekkjefølgje etter Clementslista versjon 6.6 frå august 2011:[2]
- Petroica australis longipes, Nordøya og nærliggjande øyar
- Petroica australis australis, Sørøya
- Petroica australis rakiura, Stewart Island/Rakiura
Kjelder
endre- Barrie Heather og Hugh Robertson, The Field Guide to the Birds of New Zealand (revised edition), Viking, 2005
- BirdLife International (2012) Species factsheet: Petroica australis Arkivert 2014-12-26 ved Wayback Machine.. Henta frå http://www.birdlife.org den 9. september 2012
Referansar
endre- ↑ BirdLife International 2012
- ↑ Clements, J.F.; T. S. Schulenberg; M.J. Iliff; B.L. Sullivan; C. L. Wood (august 2011), The Clements checklist of birds of the world: Version 6.6 (Excel spreadsheet), Cornell Lab of Ornithology, henta 7. januar 2012
Bakgrunnsstoff
endre
Wikimedia Commons har multimedia som gjeld: Stripeflugeskvett
- Videoar, bilete og lydopptak av stripeflugeskvettar hos Internet Bird Collection